Kids looking at a map in Pond Inlet, Canada. Assi: Vincent Desrosiers (VDOpro.co)

Tusagassiorfinnut nalunaarut - September 2016

Naggueqatigiit Inuit Canadarmiut Kalaallillu Nunap Immikkoortuani Inunnit Aqunneqartumik Aqutsiveqarfimmik pilersitsinissaq Pikialasorsuarmilu killilersugaanngitsumik angalasinnaalernissaq Piumasaraat

"Meerartatta piniarfinnaatsinni nunat aqqiluunniit ilisimajunnaarpaat, sikukkulluunniit ikaartarfik nunat sanileriit attavingat ikaarlugu angalanngisaannarsimapput. Tamannarpiaavorlu naggueqatigiinnit Inunnit Canadarmiunit kalaalliniillu tusagarput." (Pikialasorsuarmi Kommissærit)

Pikialasorsuaq pillugu Isumalioqatigiissitat angallammik atorlutik Kalaallit Nunaanni inoqarfiit avannarliit arfiniliusut Pikialasorsuarmik pinngitsuuisinnaanngitsut angallavigaat taakkunanilu piniartut innuttaasullu tusarniaaffigalugit. Imaq avammut nunarsuarmioqatiginnut attaveqaatigaat. Imarlu inoqarfinni tamaaniittuni tamanit pingaarnerpaavoq, inoqarfinnimi tamaani inuujuarsinnaasimapput piniarfimmittut Pikialasorsuarmiit uumasorpassuit nappatigiuarsimagamikkit; ammalataq Pikialasorsuarmik taagorneqartoq sikunngisaannarpoq.

Piniartut innuttaasullu Canadameersut Kalaallit Nunaanneersullu kiffaanngissuseqarlutik namminneq aalajangiinertik tunngavigalugu ilisimasatik tunniussuuppaat. Saqqummiussanilu sammineqartuni uteqattaarinertullusooq eqqaaneqartuarpoq immap sikullu aalaakkaajunnaarnerat, silap naatsorsoruminaallinera, piniakkat ingerlaartarnerisa allanngoriartornerat, uumassusillit nutaat takussaalernerat, imarnersaqaleriartornerit sikuusussaagaluartunik. Politikikkut allanngornerit ilanngullugit eqqartorpaat. Ilanngullugittaaq eqqartorpaat ungasissorsuunngitsukkut ammalatap ikaartarfissuatigoorlutik piniariartarsimanertik Umimmaat Nunaata (Ellesmere Island) Kalaallit Nunaatalu akornanni attavinitsitsisukkoorlutik tamaani Pikialasorsuup eqqaani inoqarfinnit kangillerniittut Ellesmeremut piniariartarfimminnut angalasarnertik pillugit. Siunissamut isumakuluuteqarput.

Upernaarmanna Canadami inoqarfiit Pikialasorsuarmut attuumassuteqartunut angalanitsinni tusakkatsinnut assingulluinnarput. Inuit tamaaniittut tamaani nunap immikkoortuani malinnaajuarnissamut aqutsinissamullu piukkunnarnerpaapput. Aningaasarsiornikkut ilisimatusarnikkullu oqallisigineqartariaqartut aalajangersarusuppaat, allanngoriartornernullu takussutissaasut misissuiffigineqartariaqartut piniarnermullu inatsisit tamaaniittunut piviusorsiornerusut pilersikkusuppaat siuttuuffigerusullugillu taamaaliornikkut inoqarfimminnut pilersuilluarlutik nappateqarsinnaanertik tunngavilerlugu.

Inuit tamaani akileriillutik inuusut kiffaanngissuseqarlutik angalarusussuseqarput, soorlu siusinnerusukkut taamaareersimanertik atoqqilerusuppaat, Pikialasorsuaq ikaarlugulusooq qaninnerusumik/annertunerusumik suleqatigiikkusupput ataatsimoorussamillu siunissamut takorluuinertik avitseqatigiillutillu isumalluutinik atuinertik Pikialasorsuarmik naggueqatigiinnit Inunnit siuuttuuffigineqartumik ingerlatsisuulernissartik oqariartuutigaat. Taamatuttaaq annertunerujartortumik takornariaqarnermut, umiarsuartigut angallannernut, aalisarnermut, isumalluutinik misissuinernut aamma Pikialasorsuup ilaani immap iluani sajuppillatsilluni misissuinernut tunngasut. Paatsoorneqarsinnaannginnerpaamillu naqissuserpaat, Inuit namminneq ammalatamik nakkutilliinermik paaqqinninnermillu aqutsisutut ineriartortitserusunnertik naggueqatigiittut Inuttut kissaatigaat, nunaminnik avissaarsimagaluarlutik immamik ataatsimoorfeqartutut.

Annertunerusumik paasiniaaffigineqarsinnaavoq:

Carole Simon ICC Canada
csimon@inuitcircumpolar.com
613-563-2642

Alfred Jakobsen Oceans North
aerj58@gmail.com

Kommisærit:

Okalik Eegeesiak
chair@inuitcircumpolar.com
613-563-2642

Kuupik Kleist
kvk@ggnuuk.gl
+299 54 78 58

Eva Aariak
eva.aariak@gmail.com
867-222-8355