ᐃᑭᖅ ᓯᑯᓱᐃᑦᑐᖅ ᐱᔾᔪᑎᒋᓪᓗᒍ

ᐱᑭᐊᓚᓱᖅᓱᐊᖅ: ᐆᒪᔪᖃᕐᕕᒻᒪᕆᒃ

ᐱᑭᐊᓚᓱᖅᓱᐊᖅ (ᐃᑭᖅ ᓯᑯᓱᐃᑦᑐᖅ), ᐅᕝᕙᓘᓐᓃᑦ “ᐃᒪᕐᓂᓴᖅ” ᑲᓛᖠᑎᑐᑦ, ᐊᖏᓛᖑᔪᖅ ᐅᑭᐅᖅᑕᖅᑐᒥ ᓴᕐᕙᐅᓪᓗᓂ ᐊᒻᒪᓗ ᐆᒪᔪᖃᑦᑎᐊᓛᖑᓪᓗᓂ ᐅᑭᐅᖅᑕᖅᑐᒥ ᓄᓇᕐᔪᐊᕐᒥ.  ᐱᑭᐊᓚᓱᖅᓱᐊᖅ ᐃᓕᓴᕆᔭᐅᓯᒪᕗᖅ ᐃᓄᖕᓄᑦ ᐊᒥᓲᓕᖅᑐᓄᑦ ᐅᑭᐅᓂᑦ ᐆᒪᔪᖃᕐᕕᐅᓪᓗᓂ.  ᕿᑭᖅᑖᓗᒻᒥ ᓄᓇᓕᖏᑦ (ᕿᑭᖅᑖᓗᒃ) ᐊᒻᒪᓗ ᐊᕙᓂᖅᓱᐊᖅ (ᑲᓛᖡᑦ ᐅᐊᖕᓇᖓᓂ) ᓱᓕ ᐊᖑᓇᓱᓲᖑᕗᑦ ᓴᕐᕙᑉ ᐆᒪᔪᖃᕐᓂᖓᓂᒃ.  ᐱᑭᐊᓚᓱᖅᓱᐊᖅ ᐱᒻᒪᕆᐅᕗᖅ ᓇᔪᒐᖃᕐᕕᐅᓲᖑᓪᓗᓂ ᑎᖕᒥᐊᓄᑦ ᑕᒪᐅᖓ ᐅᑭᐅᖅᑕᖅᑐᒨᓲᓄᑦ ᑖᒃᑯᐊ ᓄᓇᓖᑦ, ᐊᒻᒪᓗᑦᑕᐅᖅ ᐊᖑᓇᓱᒃᑏᑦ, ᑕᑎᖃᓲᖑᓪᓗᑎᑦ.

ᐊᕐᕌᒍᕋᑖᖑᓕᖅᑐᓂᑦ, ᐅᑭᐅᖅᑕᖅᑐᒥ ᓯᑯᕐᔪᐊᖓ ᐃᑭᖓ ᑲᐃᓐ ᐃᒪᖓᓂ, ᑲᓇᑕᑉ ᐊᑯᑭᑦᑐᓪᓗ ᐃᑭᖓᓂ, ᐊᒻᒪᓗ ᐃᑭᖅ ᓇᓗᓇᓗᐊᓕᖅᓯᒪᒻᒪᑦ ᐊᒻᒪᓗ ᓴᕐᕙᖅ ᖃᓄᐃᓕᖓᓪᓚᑦᑖᓕᕋᓗᐊᕐᒪᖔᖅ ᓇᓗᓇᓕᖅᑐᓂ.  ᑖᒃᑯᐊ ᐊᓯᔾᔨᖅᓯᒪᓂᖏᑦ, ᓯᓚ ᐊᓯᔾᔨᓕᖅᐸᓪᓕᐊᑎᓪᓗᒍᒎᖅ ᐊᒥᓱᓂᑦ ᐅᑭᐅᖅᑕᖅᑐᒥ, ᖃᐅᔨᒪᔭᐅᙱᑦᑐᖅ ᖃᓄᐃᓕᓯᒪᓕᖅᑎᑎᒻᒪᖔᖅ.

ᐱᑭᐊᓚᓱᖅᓱᐊᑉ ᓄᓇᙳᐊᖓ

ᖁᓛᓂ, ᑕᑯᔪᓐᓇᖅᑐᑎᑦ ᓄᓇᙳᐊᖓᓂᒃ ᐱᑭᐊᓚᓱᖅᓱᐊᑉ, ᕿᑭᖅᑖᓘᑉ ᑲᓇᑕᒥ ᐊᒻᒪᓗ ᐅᐊᖕᓇᖓᓂ ᑲᓛᖡᑦ ᓄᓈᓐᓂ ᐊᑯᕐᖓᖓᓃᑦᑐᖅ.  ᑭᒡᓕᖓ ᑕᑯᒃᓴᐅᑎᑕᐅᔪᖅ ᒪᐃᖑᑎᓪᓗᒍ ᖃᓄᐃᑦᑑᓲᖅ, ᐊᒻᒪᓗᑦᑕᐅᖅ ᖃᐅᔨᓴᖅᑕᐅᓯᒪᔪᑦ ᑐᑭᓯᒋᐊᕈᑎᖏᑦ ᐱᖃᓯᐅᑎᓪᓗᒋᑦ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦ ᐱᖃᓯᐅᑎᓪᓗᒋᑦ.  ᖁᒻᒧᐊᑦᑎᑕᐅᓯᒪᔪᖅᑎᒍᑦ ᐊᔾᔨᙳᐊᖓ ᐊᑦᑎᓐᓂᖅᓴᒥ ᓴᐅᒥᐊᓂ ᑕᑯᒃᓴᐅᑎᑦᑎᔪᑦ ᐆᑦᑑᑎᒥ ᓴᕐᕙᖅ ᖃᓄᐃᓕᖓᓪᓚᑦᑖᓲᖑᒻᒪᖔᖅ.

ᐃᓄᐃᑦ ᓄᓇᓕᖏᑦ ᑕᒪᒃᑮᓐᓂᒃ ᓄᓇᓕᕐᔪᐊᕐᒥ ᑕᑯᒃᓴᐅᑎᑕᐅᒻᒥᔪᑦ ᓄᓇᙳᐊᕐᒥ, ᐊᒻᒪᓗ ᓄᓇᓕᐅᔪᑦ ᐱᑭᐊᓚᓱᖅᓱᐊᖅ ᑲᑎᒪᔨᖏᑦ ᓂᐅᕐᕈᕕᒋᔭᒥᓂᖏᑦ ᓇᓗᓇᐃᖅᑕᐅᓯᒪᓪᓗᑎᑦ ᖁᖅᓱᖅᑐᒥ ᐊᒻᒪᓗᑭᑖᕐᒥ.  ᑭᒡᒐᖅᑐᐃᔨᖏᑦ ᐊᓯᖏᓐᓂᑦ ᓄᓇᓕᓐᓂ, ᐅᐸᑦᑕᐅᓯᒪᙱᑦᑐᑦ ᑭᓯᐊᓂᓕ ᑐᓴᕆᐊᕐᕕᖃᖅᑎᓪᓗᒋᑦ ᑲᑎᒪᖃᑕᒥᓃᑦ, ᐱᖃᓯᐅᔾᔭᐅᓯᒪᔪᑦ ᑎᑎᖅᑐᖅᓯᒪᔪᓂᑦ ᑕᑯᒃᓴᐅᑎᑕᐅᓪᓗᑎᑦ ᑕᓕᖅᐱᐊᓂ.

ᐃᒪᑉ ᓴᐳᔾᔭᐅᓯᒪᓂᖏᑦ ᑕᒪᒃᑮᓐᓂᒃ ᓇᓗᓇᐃᒃᑯᓯᖅᑕᐅᓯᒪᔪᑦ ᑐᖑᔪᕈᔪᒃᑑᑎᑕᐅᓪᓗᑎᑦ ᑎᑎᖅᑲᖏᑦ.  ᑲᓛᖡᑦ ᓄᓈᓐᓂ ᐱᖃᓯᐅᔾᔨᔪᑦ:

• ᕿᒧᖅᓯᕐᔪᐊᕐᒥ ᓄᓇᖓ ᓴᐳᔾᔭᐅᓯᒪᔪᖅ ᕿᒻᒥᓱᖅᓱᐊᖅ
• ᐃᓗᓕᔅᓴᑦ
• ᑭᑦᓱᔅᓱᙳᐃᑦ

ᑲᓇᑕᒥ ᐱᖃᓯᐅ−ᔨᔪᑦ:

• ᓂᕆᔪᑎᖃᕐᕕᒃ ᑲᓇᑕᒥ ᓂᕐᔪᑎᓄᑦ ᓴᓂᕐᕙᖅᑕᐅᓯᒪᔪᖅ
• ᐊᒃᐸᑦᑐᕐᒥ ᓴᓂᕐᕙᖅᑕᐅᓯᒪᔪᖅ
• ᐊᑭᐊᓂ ᑎᖕᒥᐊᓄᑦ ᓴᓂᕐᕙᖅᑕᐅᓯᒪᔪᖅ
• ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᒃ (ᑲᖏᖅᖢᕈᓗᒃ)

ᑲᓇᑕᒥ ᐃᒪᑉ ᓴᐳᔾᔭᐅᖁᔭᐅᔪᖅ ᑕᓪᓗᕈᑎᐅᑉ ᑕᕆᐅᖓ ᑲᓇᑕᒥ ᑕᑯᒃᓴᐅᑎᑕᐅᒻᒥᔪᖅ ᕿᕐᓂᖅᑕᒥᒃ ᑎᑎᕋᖅᑕᐅᓯᒪᓪᓗᓂ.

ᓂᕐᔪᑏᑦ ᐱᑭᐊᓚᓱᖅᓱᐊᕐᒥ

ᐱᑭᐊᓚᓱᖅᓱᐊᖅ ᐆᒪᔪᖃᓛᖑᕗᖅ ᐅᑭᐅᖅᑕᖅᑐᒥ ᓄᓇᕐᔪᐊᕐᒥ ᐊᒥᓱᑦ ᐱᔾᔪᑏᑦ ᐱᔾᔪᑎᒋᓪᓗᒋᑦ.  ᐱᒻᒪᕆᐅᓛᖑᔪᖅ ᓴᙱᔪᒥᒃ ᐃᒪᖓ ᐃᖏᕐᕋᓂᖃᕐᒪᑦ ᑎᓴᐃᖓᔪᒥᒃ ᐊᒻᒪᓗ ᓂᕿᑦᑎᐊᕙᖃᐅᖅᑐᓂᑦ ᐃᒪᕐᒥᒃ ᐃᒪᑉ ᖄᖓᓅᖅᑲᐃᓲᖅ, ᐊᒻᒪᓗ ᓯᑯᖃᙱᑦᑎᓪᓗᒍ ᓯᕿᓂᖅ ᐃᒪᑉ ᖄᖓᓅᖓᓂᖃᓲᖑᒻᒪᑦ.  ᑕᐃᒪᐃᑦᑎᓪᓗᒍ ᐱᐅᔫᕗᖅ ᐃᒪᕐᒥ ᐱᕈᖅᑐᕋᓛᑦ ᐊᒥᓱᕈᖅᓴᕋᐅᓲᖑᓪᓗᑎᑦ ᐊᒻᒪᓗ ᐊᒥᓲᓂᖅᓴᐅᓲᖑᓪᓗᑎᑦ ᐊᓯᖏᓐᓂᒃ ᖃᓂᑦᑐᓂ ᑕᐃᒪᐃᙱᑦᑎᓪᓗᒍ.

ᑕᒪᒃᑯᐊ ᐃᒪᕐᒥ ᐱᕈᖅᑐᕋᓛᑦ ᓂᕆᔭᐅᖅᑳᓲᖑᓪᓗᑎᑦ ᐆᒪᔪᕐᓂ, ᐆᒪᔪᕋᓛᕐᓄᑦ ᓂᕆᔭᐅᓕᓲᑦ ᓲᕐᓗᒃ ᓄᕙᖅᑭᕈᔪᓐᓄᑦ, ᐊᓯᖏᓐᓄᑦ ᐃᖃᓗᓐᓄᑦ ᓂᕆᔭᐅᓕᓲᑦ ᓲᕐᓗᒃ ᐆᒐᕐᓄᑦ − ᐆᒪᔪᐃᑦ ᑖᒃᑯᐊ ᐱᒻᒪᕆᐅᓪᓗᑎᑦ ᐊᓯᖏᓐᓄᑦ ᐆᒪᔪᕐᓄᑦ.  ᑕᐃᒪᐃᑦᑎᓪᓗᒋᑦ ᓴᕐᕙᒥ ᓂᕆᖃᑦᑕᐅᑎᓂᖅᓴᐅᓲᑦ ᐊᒻᒪᓗ ᐅᑮᓪᓗᑎᑦ ᐊᒥᓱᑦ ᑎᖕᒥᐊᑦ, ᓇᑦᑏᑦ, ᕿᓚᓗᒐᑦ ᐊᒻᒪᓗ ᐊᓯᖏᑦ ᐳᐃᔨᓄᑦ.

ᓴᕐᕙᒃ ᐃᑲᔪᖅᑐᐃᒻᒥᔪᖅ ᐆᒪᔪᕐᓂᑦ, ᓲᕐᓗᒃ ᑕᕆᐅᕐᒥᐅᑕᐃᑦ, ᐃᖅᑲᕐᒥᐅᑕᐃᓪᓗ ᐃᑎᔪᕐᒥᐅᑦ ᐅᕝᕙᓘᓐᓃᑦ ᐊᒥᓱᑦ ᑎᖕᒥᐊᑦ ᓯᔾᔭᒥ ᖃᓂᒋᔭᖓᓃᓲᑦ − ᐊᒻᒪᓗᑦᑕᐅᖅ ᐃᓄᐃᑦ ᓄᓇᓕᖏᑦ ᑲᓛᖡᑦ ᓄᓈᓐᓂ ᐊᒻᒪᓗ ᑲᓇᑕᒥ ᓴᕐᕙᑉ ᐆᒪᔪᖏᓐᓂᑦ ᓂᕿᑖᖃᑦᑕᓲᑦ.

ᐊᓪᓕᕐᒥ ᑎᑎᖅᑐᖅᓯᒪᔪᑦ ᓂᕐᔪᑎᐅᓲᑦ ᓴᕐᕙᒦᓲᑦ ᐅᕝᕙᓘᓐᓃᑦ ᓴᕐᕙᑉ ᐱᓪᓗᒍ ᐊᑦᑐᖅᑕᐅᓂᖃᓲᑦ:

• ᐆᒪᔪᕋᓚᑦ:  ᐱᕈᖅᑐᕋᓛᑦ,  ᐆᒪᔪᕋᓛᑦ ᖁᐱᕐᕈᐃᑦ ᐱᖃᓯᐅᑎᓪᓗᒋᑦ ᐆᒪᔪᕋᓛᑦ ᐃᒪᕐᒥᐅᑕᐃᑦ
  
• ᐃᖃᓗᐃᑦ:  ᐃᖃᓗᒃᐱᒃ, ᐆᒐᑦ,  ᑲᓛᖡᑦ ᓄᓈᓐᓂ ᐆᒐᑦ,  ᖃᓕᕋᓕᒃ
  
• ᑎᖕᒥᐊᑦ:  ᐊᖅᐲᑦ,  ᐃᓱᙵᑦ,  ᐃᒥᖅᑯᑕᐃᓚᒃ,  ᓯᒡᒍᑲᓪᓚᓖᑦ ᑎᖕᒥᐊᑦ,  ᑎᕋᑎᕋᖅ,  ᒥᑏᑦ,  ᓇᐅᔭᑦ,  ᐊᐅᒃ,  ᖃᖁᓪᓗᒃ,  ᐃᕿᒡᒐᒋᐊᕐᔪᒃ,  ᐊᑉᐸ
• ᐳᐃᔩᑦ:  ᕿᓚᓗᒐᑦ,  ᐅᒡᔪᑦ,  ᐊᕐᕖᑦ,  ᖃᐃᕈᓖᑦ,  ᐊᐸ,  ᑑᒑᓕᒃ,  ᓇᑦᑎᖅ,  ᓇᓄᐃᑦ,  ᐊᐃᕖᑦ
• ᑕᕆᐅᕐᒥᐅᑕᐃᑦ:  ᑭᖑᒃᐸᐃᑦ
• ᐃᖅᑕᕐᓯᐅᑕᐃᑦ:  ᐃᑏᑦ,  ᐊᒻᒨᒪᔪᑦ,  ᐳᔾᔫᑏᑦ,  ᑕᓪᓗᕈᓐᓇᑦ,  ᖁᐱᕐᕈᑦ ᐃᖅᑲᕐᒥᐅᑦ,  ᐅᒡᔪᓐᓇᑦ,  ᑕᕆᐅᕐᒥᐅᑕᑦ ᐱᕈᖅᑐᑦ.