ᐱᓕᕆᐊᖑᔪᖅ ᐱᔾᔪᑎᒋᓪᓗᒋᑦ

ᖃᓄᐃᓕᐅᕈᑕᐅᖃᑦᑕᖅᓯᒪᓂᖏᑦ ᐱᓕᕆᐊᑉ

2013−ᒥ ᐅᓂᒃᑳᑉ ᒪᑉᐱᒐᖓ ᓯᕗᓪᓕᖅᓯᑏᕝᕙ 2013-ᖑᑎᓪᓗᒍ, ᐃᓄᐃᑦ ᓯᓚᕐᔪᐊᕐᒥᐅᑦ ᑲᑐᔾᔨᖃᑎᒌᖏᑦ − ᓅᒃ−ᒥ ᑲᓛᖡᑦ ᓄᓈᓐᓂ ᑭᒡᒐᖅᑐᐃᔨᖏᑦ ᓄᓇᓕᓐᓂ ᐱᑭᐊᓚᓱᖅᓱᐊᑉ ᖃᓂᒋᔭᖏᓐᓃᑦᑐᓂᑦ ᑲᑎᓚᐅᖅᓯᒪᔪᑦ ᐅᖃᐅᓯᖃᖅᑐᑎᑦ ᓴᕐᕙᕐᔪᐊᕐᒥ ᐊᒻᒪᓗ ᖃᐅᔨᓴᖅᑐᑎᑦ ᐃᓱᒫᓗᒍᑎᒋᔭᐅᔪᑦ ᐊᒻᒪᓗ ᖃᓄᐃᓕᐅᕈᑎᖃᕈᒪᔾᔪᑎᖏᑦ ᑕᒪᔅᓱᒥᖓ ᐊᕕᑦᑐᖅᓯᒪᔪᒥᒃ.   ᑕᒪᓐᓇ ᑲᑎᒪᓂᐅᔪᖅ ᓇᓗᓇᐃᕈᑎᒋᔭᐅᓚᐅᖅᑐᖅ ᓴᙱᔪᒥᒃ ᑕᒫᓂᕐᒥᐅᑕᐅᔪᑦ ᐱᓕᕆᖃᑎᖃᕈᒪᒻᒪᑕ ᐊᓯᐊᓂᒃ ᓄᓇᓕᕐᔪᐊᖑᔪᒥᒃ ᐅᖃᖃᑎᖃᕈᒪᓪᓗᑎᑦ ᓴᕐᕙᕐᔪᐊᑉ ᒥᕗᒃᓴᖓ ᐱᓪᓗᒍ.  ᑖᒃᑯᐊ ᑲᑎᓚᐅᖅᑐᑦ ᐃᓱᒪᓕᐅᓚᐅᖅᑐᑦ ᑲᑎᒪᑎᓪᓗᒋᑦ ᐊᒻᒪᓗ ᐅᓂᑳᓕᐊᕆᔭᐅᓯᒪᓕᖅᑐᒥᒃ ("ᑲᓱᖅᑎᑕᐅᓂᖅ ᐃᒪᖓ") ᑲᒥᓴᐅᔪᕐᒥᒃ ᑲᑎᒪᔨᓂᑦ ᐋᖅᑮᔪᖃᕆᐊᖃᕐᒪᑦ ᑐᓴᕆᐊᕐᕕᖃᖃᑦᑕᕋᔭᕐᓗᑎᑦ ᓄᓇᕗᒻᒥ ᐊᒻᒪᓗ ᑲᓛᖡᑦ ᓄᓈᓐᓂ ᖃᓂᒋᔭᖏᓐᓃᓛᖑᔪᓂᑦ ᓄᓇᓕᓐᓂ ᐅᖃᐅᓯᖃᒃᑲᓐᓂᖁᔭᐅᓪᓗᑎᑦ ᐊᒻᒪᓗ ᖃᐅᔨᓴᖅᑕᐅᓗᑎᑦ ᖃᓄᖅᑑᕈᑎᒃᓴᐅᔪᑦ ᐸᐸᑕᐅᖁᓪᓗᒍ ᐃᒪᖓ, ᐱᖃᓯᐅᑎᓗᒋᑦ ᐊᖑᓇᓱᓐᓂᕐᒧᑦ ᐊᑐᖅᑕᐅᔪᒪᓲᑦ, ᓯᕗᓂᒃᓴᒥ ᑭᖑᕚᒃᓴᑦ ᐱᔾᔪᑎᒋᓪᓗᒋᑦ.

ᐃᓄᖕᓄᑦ ᖃᓄᖅᑑᕈᑕᐅᓯᒪᔪᖅ ᐱᑭᐊᓚᓱᖅᓱᐊᑉ ᓯᕗᓂᒃᓴᖓᓄᑦ

ᑐᓴᕆᐊᕐᕕᖃᖅᑐᑎᑦ ᑲᑎᒪᑎᑦᑎᔪᑦ ᐃᓄᓕᒫᖅᑎᑎᓪᓗᑎᑦ ᓴᕕᔅᓯᕕᒻᒥ.ᓯᕗᓕᖅᑎᒋᔭᐅᓪᓗᑎᑦ ᐱᖓᓱᑦ ᑲᑎᒪᔨᐅᔪᑦ, ᐅᖃᓕᖅ ᐃᔨᑦᓯᐊᖅ (ᐃᒃᓯᕙᐅᑕᖓ ᓯᓚᕐᔪᐊᕐᒥ ᐃᓄᐃᑦ ᑲᑐᔾᔨᖃᑎᒌᖏᑦ), ᑰᐱᒃ ᑭᓖᔅᑦ (ᑲᓛᖡᑦ ᓄᓈᓐᓂ ᓯᕗᓕᖅᑎᐅᓚᐅᖅᓯᒪᔪᖅ) ᑲᓛᖡᑦ ᓄᓈᓐᓂ ᑭᒡᒐᖅᑐᐃᓪᓗᓂ ᑲᑎᒪᔨ, ᐊᒻᒪᓗ ᐄᕙ ᐋᕆᐊᒃ (ᓄᓇᕗᒻᒥ ᓯᕗᓕᖅᑎᐅᓚᐅᖅᓯᒪᔪᖅ) ᑲᓇᑕᒥ ᑭᒡᒐᖅᑐᐃᓪᓗᓂ ᑲᑎᒪᔨᐅᖃᑕᐅᔪᖅ, ᐱᑭᐊᓚᓱᖅᓱᐊᖅ ᑲᑎᒪᔨᖏᑦ ᐱᓇᓱᐊᒐᖃᖅᑎᑕᐅᕗᑦ ᑐᓴᕆᐊᕐᕕᖃᖃᑦᑕᕐᓗᑎᑦ ᓄᓇᕗᒻᒥ ᓄᓇᓕᖏᓐᓂ ᐊᒻᒪᓗ ᑲᓛᖡᑦ ᓄᓈᓐᓂ ᐱᑭᐊᓚᓱᖅᓱᐊᕐᒥ ᐊᑐᖃᑦᑕᓲᓂᑦ.

ᐃᑲᔪᖅᑐᖅᑕᐅᓪᓗᑎᑦ ᐆᒃ ᑐᙵᕕᖓ, ᐃᒪᕐᒥᐅᑕᓕᕆᔩᑦ ᐅᑭᐅᖅᑕᖅᑐᒥ ᐊᒻᒪᓗ ᓄᓇᕐᔪᐊᕐᒥ ᐆᒪᔪᑦ ᑮᓇᐅᔭᖃᖅᑎᑦᑎᔨᖏᑦ ᑲᑎᒪᔨᐅᔪᑦ ᑐᓴᕆᐊᕐᕕᖃᖃᑦᑕᖅᓯᒪᓕᖅᑐᑦ ᑲᓇᑕᒥ ᐃᓄᐃᑦ ᓄᓇᓕᓐᓂ ᐄᐳᕈᓪ 2016−ᖑᑎᓪᓗᒍ (ᐊᐅᓱᐃᑦᑐᒥ, ᖃᐅᓱᐃᑦᑐᒥ, ᐃᒃᐱᐊᕐᔪᒻᒥ, ᒥᑦᑎᒪᑕᓕᒻᒥ ᐊᒻᒪᓗ ᑲᖏᖅᑐᒑᐱᖕᒥ) ᐊᒻᒪᓗ ᑲᓛᖡᑦ ᓄᓈᑕ ᐅᐊᖕᓇᖓᓂ ᓯᑏᕝᕙ 2016-ᖑᑎᓪᓗᒍ ᑐᓴᕆᐊᕐᕕᖃᖅᑐᑎᑦ ᐃᓄᖕᓂᑦ ᑲᓛᖠᕐᒥᐅᑕᓂᑦ ᐱᑭᐊᓚᓱᖅᓱᐊᖅ (ᓯᐅᕋᐸᓗᒃ, ᖄᓈᖅ, ᓴᕕᔅᓯᕕᒃ, ᑯᖦᖢᖅᓱᐊᖅ, ᓅᔅᓱᐊᖅ ᐊᒻᒪᓗ ᐅᐱᕐᓇᕕᒃ).

ᑐᓴᕆᐊᕐᕕᖃᖅᑎᓪᓗᒋᑦ ᐊᑐᕐᓂᐊᖅᑕᒥᓂᒃ ᐋᖅᑭᒃᓱᐃᓯᒪᓚᐅᖅᑐᑦ ᓄᓇᓕᓐᓂ ᐊᕕᑦᑐᖅᓯᒪᔪᓂᓪᓗ ᑐᓴᕐᓂᐊᕐᒪᑕ, ᐊᑐᓕᖅᑎᑕᐅᓗᑎᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᐅᓂᖏᑦ, ᐊᒻᒪᓗ ᐊᑐᓕᖁᔨᓗᑎᑦ ᐃᓄᐃᑦ ᖃᓄᖅᑑᕈᑎᖓᓂᒃ ᐸᐸᑕᐅᖁᓪᓗᒍ, ᐅᐊᑦᑎᔭᐅᖁᓪᓗᒍ ᐊᒻᒪᓗ ᐊᐅᓚᑕᐅᖁᓪᓗᒍ ᖃᓄᐃᙱᑐᒃᑯᑦ ᐱᑭᐊᓚᓱᖅᓱᐊᖅ ᓯᕗᓂᒃᓴᒥ ᑭᖑᕚᖑᓛᖅᑐᑦ ᐱᓪᓗᒋᑦ.

ᐱᓇᓱᐊᒐᖓᑕ ᐅᖃᖅᓯᒪᓂᖏᓂᑦ & ᖃᓄᐃᓕᐅᕈᑎᒋᔭᐅᓂᐊᖅᑐᑦ ᐸᕐᓇᐅᑎᖏᑦ

ᐱᔾᔪᑎᖓ ᐱᑭᐊᓚᓱᖅᓱᐊᑉ ᑲᑎᒪᔨᖏᑦ ᐊᑐᓕᖁᔨᓗᑎᑦ ᐃᓄᖕᓄᑦ ᖃᓄᖅᑑᕈᑕᐅᓯᒪᔪᒥᒃ ᐸᐸᑕᐅᖁᓪᓗᒍ, ᐅᐊᑦᑎᔭᐅᖁᓪᓗᒍ ᐊᒻᒪᓗ ᐊᐅᓚᑕᐅᖁᓪᓗᒍ ᖃᓄᐃᙱᑐᒃᑯᑦ ᐱᑭᐊᓚᓱᖅᓱᐊᖅ ᓯᕗᓂᒃᓴᒥ ᑭᖑᕚᖑᓛᖅᑐᑦ ᐱᓪᓗᒋᑦ − ᐊᒻᒪᓗ ᖃᐅᔨᓴᕐᓗᑎᑦ ᐋᖅᑮᔾᔪᑎᒃᓴᓂᑦ ᐃᓄᖕᓄᑦ ᓯᕗᒃᑲᑕᖅᑕᐅᓯᒪᔪᒥᒃ ᐊᐅᓚᔾᔪᑎᒋᔭᒃᓴᖏᓐᓂᑦ ᐱᑭᐊᓚᓱᖅᓱᐊᑉ.  ᑕᒪᓐᓇ ᑐᙵᕕᖃᕐᓂᐊᖅᑐᖅ ᑐᓴᕆᐊᕐᕕᖃᓚᐅᖅᑎᓪᓗᒋᑦ ᐅᖃᐅᓯᕐᒥᓂᕐᓂᒃ ᐊᒻᒪᓗ ᐃᖅᑲᓇᐃᔭᖃᑎᒌᒃᑲᓐᓂᕈᑎᒃᓴᖏᓐᓂᑦ ᐃᓄᐃᑦ ᓄᓇᓕᖕᓂ ᓄᓇᕗᒻᒥ ᐊᒻᒪᓗ ᑲᓛᖡᑦ ᓄᓈᑕ ᐅᐊᖕᓇᖓᓂᕐᒥᐅᑕᓂᑦ ᓴᕐᕙᕐᔪᐊᕐᒥ ᐊᒻᒪᓗ ᐆᒪᔪᖏᓐᓂᑦ ᐊᓐᓇᐅᒪᔾᔪᑎᖃᓲᕐᓂᑦ.

ᐃᖅᑲᓇᐃᔮᒃᓴᖏᑕ ᓇᓗᓇᐃᔭᖅᓯᒪᓂᖏᑦ

ᐃᖅᑲᓇᐃᔮᒃᓴᖏᑕ ᓇᓗᓇᐃᔭᖅᓯᒪᓂᖏᑦ ᐅᖃᐅᓯᐅᕗᑦ ᓇᓗᓇᐃᔭᐃᓯᒪᔪᑦ ᖃᓄᐃᓕᐅᕈᑕᐅᖃᑦᑕᖅᓯᒪᓂᖏᓐᓂᑦ, ᐱᔾᔪᑎᖏᓐᓂᑦ, ᐋᖅᓱᑭᖅᓯᒪᓂᖏᓐᓂᑦ ᐱᑭᐊᓚᓱᖅᓱᐊᑉ ᑲᑎᒪᔨᖏᑕ.