ᑐᓴᒐᒃᓴᖅ - ᓄᕖᕝᕙ 2017

ᑐᓴᒐᒃᓴᖅ - ᓄᕖᕝᕙ 2017

23. ᓄᕕᐱ. 2017 | ᐆᒪᑉ: Commission

ᐃᓄᓐᓄᑦ ᑕᐅᑐᙳᐊᖅᑕᐅᔪᖅ ᐊᑐᖅᑕᐅᔪᒪᓛᖅᑐᖅ ᐱᑭᐊᓚᓱᖅᓱᐊᑉ ᓯᕗᓂᒃᓴᖓᓄᑦ

ᑯᐸᓐᕼᐊᐃᒐᓐ, ᑎᐊᓐᒫᒃ; ᓅᒃ, ᑲᓛᖡᑦ ᓄᓈᑦ; ᐃᖃᓗᐃᑦ, ᓄᓇᕗᑦ

ᐃᓄᐃᑦ ᓯᓚᕐᔪᐊᕐᒥᐅᑦ ᑲᑎᒪᔨᖏᑕ ᐱᑭᐊᓚᓱᖅᓱᐊᑉ ᑲᒥᓴᙱᑦ ᐋᖅᑮᖁᔨᕗᑦ ᐃᓄᓐᓄᑦ ᓇᓗᓇᐃᖅᑕᐅᓯᒪᔪᒥᒃ, ᐃᓄᓐᓄᑦ−ᐊᐅᓚᑕᐅᓂᐊᖅᑐᒥᒃ ᓴᐳᔾᔭᐅᓯᒪᓗᓂ ᐃᒪᖓ ᓄᓇᖓᓗ ᐊᒻᒪᓗ ᐃᓕᖅᑯᓯᕐᒧᑦ ᐱᒻᒪᕆᐅᓪᓗᓂ ᑲᑐᔾᔭᐅᔪᖅ ᑲᓇᑕᒧᑦ ᐊᒻᒪᓗ ᑲᓚᖡᑦ ᓄᓈᓐᓄᑦ ᖁᑦᑎᒃᑐᒥ, ᐊᒻᒪᓗᑦᑕᐅᖅ ᐅᑎᖅᑎᑕᐅᓗᓂ ᐊᑭᖃᙱᑦᑐᒃᑯᑦ ᐃᓱᒪᖅᓱᓇᖅᑐᒃᑯᑦ ᓅᒍᓐᓇᕐᓗᑎᑦ ᐃᓄᐃᑦ ᑲᓱᖅᓯᒪᔪᑐᖃᐅᖃᑦᑕᖅᓯᒪᔪᑦ ᓄᓇᓕᐅᔪᓄᑦ ᓂᐅᕐᕈᒍᓐᓇᕐᓗᑎᑦ ᑕᒪᒃᑮᓐᓄᒃ ᓄᓇᓕᕐᔪᐊᓄᒃ.

ᐱᒋᐊᓚᖅᓱᖅᓱᐊᖅ ᑲᓛᖡᑦ ᓄᓈᓐᓂ ᐊᑎᕆᔭᐅᕗᖅ ᐅᐊᓐᓇᖓᑕ ᓴᕐᕙᖓ − ᓴᕐᕙᐅᓪᓗᓂ ᐃᒪᕐᒥᐅᑕᓂᑦ ᐳᐃᔨᖃᐅᕈᓘᔭᖅᑐᖅ ᓂᕿᖃᓲᑦ ᓂᕿᖃᖅᑎᑦᑎᓪᓗᓂ ᐃᒪᖓ ᐊᒻᒪᓗ ᐊᓄᕆᓂᖓᓄᑦ ᑕᐅᕙᓂ. ᑲᒥᓴᙳᔪᖅ ᐃᓄᓐᓄᑦ ᑲᒪᒋᔭᐅᓪᓗᓂ ᑲᓛᖡᑦ ᓄᓈᓐᓂ ᐊᒻᒪᓗ ᑲᓇᑕᒥ, ᐊᒻᒪᓗ ᓯᕗᓪᓕᖅᐹᖓᓂ ᐅᓂᒃᑳᓕᐊᕆᓯᒪᔭᖓ ᐱᒻᒪᕆᐅᔪᖅ, "ᐃᓄᐃᑦ ᓄᖕᓂᕐᒥᐅᑦ: ᐱᑭᐊᓚᓱᖅᓱᐊᑉ ᓯᕗᓂᒃᓴᖓ," ᐅᑯᓂᖓ ᐊᑐᓕᖁᔨᓚᐅᖅᑐᑦ ᐸᐸᑕᐅᖁᓪᓗᒍ ᑕᒪᓐᓇ ᑲᒪᒋᔭᐅᓗᓂᓗ ᐊᐅᓚᑦᑎᔨᖃᕐᓗᑎᑦ:

ᐋᖅᑮᔪᖃᕐᓗᓂ ᐊᐅᓚᑕᐅᕝᕕᐅᔪᒥᒃ ᓯᕗᓕᖅᑎᖃᕐᓗᑎᑦ ᐃᓄᐃᑦ ᑭᒡᒐᖅᑐᐃᔨᖏᓐᓂᑦ ᓄᓇᓕᓐᓃᙶᖅᑐᑦ ᐱᑭᐊᓚᓱᖅᓱᐊᕐᒥ.
ᑐᓴᕆᐊᕐᕕᖃᓚᐅᕐᓗᑎᑦ ᓄᓇᓕᖏᓐᓂ ᐊᑭᖏᓐᓃᑦᑐᑦ ᐱᑭᐊᓚᓱᖅᓱᐊᕐᒥ, ᓇᓗᓇᐃᖅᓯᓗᑎᑦ ᓴᐳᔾᔭᐅᒐᔭᖅᑐᒥᒃ ᓴᕐᕙᖓᓂ ᐊᒻᒪᓗ ᐊᖏᓂᖅᓴᐅᔪᒥᒃ ᐊᐅᓚᑕᐅᕝᕕᐅᒐᔭᖅᑐᒥᒃ ᓄᓇᓕᐅᔪᓄᑦ ᐊᑐᖅᑕᐅᓲᓂᑦ, ᓄᓇᒦᙶᖅᑐᓪᓗ ᓴᕐᕙᖓᓗ. ᑕᒪᒃᑯᐊ ᓴᐳᔾᔭᐅᕝᕕᐅᒐᔭᖅᑐᑦ ᐅᐊᑦᑎᔭᐅᖃᑦᑕᕋᔭᕐᒪᑕ ᐊᒻᒪᓗ ᐊᐅᓚᑕᐅᓗᑎᑦ ᐃᓄᓐᓄᑦ ᐊᖏᖃᑎᒌᑦᑐᓄᑦ ᐊᒻᒪᓗ ᐃᓕᓴᖅᔭᐅᓗᑎᑦ ᒐᕙᒪᐅᔪᓄᑦ.
ᐋᖅᑮᔪᖃᕐᓗᓂ ᐊᑭᖃᙱᑦᑐᒃᑯᑦ ᐊᐅᓪᓚᕕᒃᓴᐅᔪᓂᑦ ᐃᓄᓐᓄᑦ ᐱᑭᐊᓚᓱᖅᓱᐊᕐᒥᐅᑕᓄᑦ.

"ᐃᓄᐃᑦ ᓯᓚᕐᔪᐊᕐᒥᐅᑦ ᑲᑎᒪᔨᖏᑦ ᐱᑭᐊᓚᓱᖅᓱᐊᖅ ᑲᒥᓴᓐᑯᖏᑕ ᐊᐅᓚᓂᖓᓂᒃ ᐱᒋᐊᓚᐅᖅᓯᒪᔪᖅ ᓄᓇᓕᐅᔪᓂᑦ ᐊᒻᒪᓗ ᑖᓐᓇ ᐅᓂᒃᑳᕆᕚ. ᐱᑭᐊᓚᓱᖅᓱᐊᒃᑯᑦ ᑲᒥᓴᙱᑕ ᐊᐅᓚᓂᖓ ᐋᖅᑭᓱᖅᑕᐅᓚᐅᖅᓯᒪᔪᖅ ᐃᓄᓐᓄᑦ ᑲᒪᒋᔭᐅᖅᑳᖅᑐᓂ ᐊᖓᔪᖅᑳᒡᒍᑎᓄᑦ ᑲᒪᒋᔭᐅᓕᖅᑐᓂ ᐊᒻᒪᓗ ᓱᖅᑯᐃᓇᑦᑎᐊᖅᑐᖅ ᐃᓄᐃᑦ ᐱᑭᐊᓚᓱᖅᓱᐊᕐᒥᐅᑦ ᓯᕗᓕᖅᑎᐅᔪᒪᕗᑦ ᐊᐅᓚᑦᑎᖃᑦᑕᕐᓗᑎᑦ ᐱᑭᐊᓚᓱᖅᓱᐊᕐᒥ," ᐅᖃᖅᑐᓂ ᐅᑲᓕᒃ ᐃᔨᑦᓯᐊᖅ, ᐃᒃᓯᕙᐅᑕᖅ ᐃᓄᐃᑦ ᓯᓚᕐᔪᐊᕐᒥᐅᑦ ᑲᑎᒪᔨᖏᓐᓄᑦ.

"ᑲᓛᖡᑦ ᓄᓈᑦ ᐊᒻᒪᓗ ᑲᓇᑕ ᑲᑐᔾᔨᒻᒪᑎᒃ ᐅᑭᐅᖅᑕᖅᑐᒥ ᑭᓱᖃᕈᓘᔭᖅᑐᒥᒃ. ᑐᓴᖃᑦᑕᓚᐅᖅᑐᒍᑦ ᓂᐱᖅᑯᖅᑐᔪᓂᑦ ᓱᖅᑯᐃᓇᑦᑎᐊᖅᑐᑯᓘᓪᓗᑎᓪᓗ ᓄᓇᓕᒻᒥᐅᑕᐅᔪᑦ ᐱᑭᐊᓚᓱᖅᓱᐊᕐᒥ ᐊᑐᓲᑦ ᐱᕙᓪᓕᐊᑎᑦᑎᖁᔨᓂᖏᓐᓂᑦ ᓴᐳᔾᔭᐅᓕᕐᓗᓂ ᐱᑭᐊᓚᓱᖅᓱᐊᖅ ᓯᕗᓂᒃᓴᒥ ᑭᖑᕚᕆᔭᐅᔪᓄᑦ ᐊᑐᖅᑕᐅᖃᑦᑕᓛᕐᒪᑦ. ᐃᓄᐃᑦ ᓄᓇᓕᒻᒥᐅᑕᐅᔪᑦ ᐊᑭᐊᓂ ᐱᑭᐊᓚᓱᖅᓱᐊᖅ ᐃᓚᐅᖃᑕᐅᖃᑦᑕᕈᒪᕗᑦ ᐊᐅᓚᑕᐅᓂᖓᓂᒃ ᐊᒻᒪᓗ ᐅᐊᑦᑎᔭᐅᓂᖓᓂᒃ ᑕᒪᔅᓱᒪᑉ ᐊᔾᔨᐅᙱᑦᑐᑉ ᐃᒪᑉ. ᐃᓕᓴᖅᓯᓯᒪᒻᒪᑕ ᖃᓄᐃᑦᑕᐃᓕᓂᖏᑦ ᐆᒪᔪᐃᑦ ᓂᕿᖃᕐᕕᒋᓲᖏᑦ ᑲᓱᖅᓯᒪᒻᒪᑕ ᖃᓄᐃᑦᑕᐃᓕᓂᖓᓂᒃ ᐱᑭᐊᓚᐅᓱᖅᓱᐊᑉ," ᐅᖃᖅᑐᓂ ᑰᐱᒃ ᕕ. ᑭᓖᔅᑦ, ᑲᓛᖡᑦ ᓄᓈᑦᑕ ᑲᒥᓯᓇᖓ ᐊᒻᒪᓗ ᓯᕗᓕᖅᑎᐅᓚᐅᖅᓯᒪᔪᖅ ᑲᓛᖡᑦ ᓄᓈᓐᓂ.

ᑲᒥᓴᓐ ᐃᑲᔪᖅᑐᖅᑕᐅᔪᒪᕗᖅ ᒐᕙᒪᒃᑯᓐᓂ ᐊᑐᓕᖅᑎᑕᐅᓗᑎᑦ ᐊᑐᓕᖁᔭᐅᓯᒪᔪᑦ ᐅᓂᒃᑳᒦᑦᑐᑦ. "ᑕᒪᐃᓐᓂᓕᒫᖅ ᒐᕙᒪᒃᑯᓐᓄᑦ ᑲᒪᒋᔭᐅᓗᓂ ᐃᓕᓴᕆᔭᐅᓕᕐᓂᐊᖅᑐᖅ ᑕᒪᓐᓇ ᐱᒻᒪᕆᐅᓛᖑᒻᒪᑦ ᖃᓄᐃᓕᐅᕈᑎᖃᕆᐊᓯᓗᑎᑦ ᐃᓄᐃᑦ ᓇᒻᒥᓂᖅ ᑲᒪᒍᓐᓇᕐᓂᖏᓐᓂ ᐊᐅᓚᑦᑎᓗᑎᓪᓗ ᓄᓇᖏᓐᓂ ᐃᒪᖏᓐᓂᓗ. ᑲᒥᓴᓐᑯᑦ ᐊᒻᒪᓗ ᐃᓄᐃᑦ ᓯᓚᕐᔪᐊᕐᒥᐅᑦ ᑲᑎᒪᔨᖏᑦ ᐊᔭᐅᕆᕗᑦ ᒐᕙᒪᐅᔪᓂᑦ ᑲᓇᑕᒥ, ᑲᓛᖡᑦ ᓄᓈᑦ ᐊᒻᒪᓗ ᑎᐊᓐᒫᒃ ᐃᖅᑲᓇᐃᔭᖃᑎᖃᕐᓗᑎᑦ ᐃᓄᓐᓂᒃ ᐱᐅᔪᒥᒃ ᓯᕗᓂᒃᓴᖃᑦᑎᐊᑎᑦᑎᓗᑎᑦ ᐱᑭᐊᓚᓱᖅᓱᐊᖅ ᐊᒻᒪᓗ ᐃᓄᖏᑦ ᐱᓪᓗᒋᑦ," ᐅᖃᖅᑐᓂ ᐄᕙ ᐋᕆᐊᒃ, ᑲᓇᑕᒥ ᑲᒥᓯᓇ, ᐊᒻᒪᓗ ᓄᓇᕗᒻᒥ ᓯᕗᓕᖅᑎᐅᓚᐅᖅᓯᒪᔪᖅ.

ᐱᑭᐊᓚᓱᖅᓱᐊᖅ ᒥᒃᓵᓄᑦ

ᐱᑭᐊᓚᓱᖅᓱᐊᖅ, ᐅᕝᕙᓘᓐᓃᑦ "ᓴᕐᕙᕐᔪᐊᖅ", ᐅᑭᐅᖅᑕᖅᑐᒥ ᐊᖏᓛᖒᕗᖅ ᓴᕐᕙᐅᓪᓗᓂ ᐊᒻᒪᓗ ᐆᒪᔪᖃᑦᑎᐊᓛᖑᕙᑦᑐᓂ ᓄᓇᕐᔪᐊᑉ ᐅᑭᐅᖅᑕᖅᑐᖓᓂ. ᐱᑭᐊᓚᓱᖅᓱᐊᖅ ᐃᓕᓴᕆᔭᐅᓯᒪᕗᖅ ᐃᓄᓐᓄᑦ ᑕᐃᒪᙵᓕᒫᖅ ᐱᒻᒪᕆᐅᓪᓗᓂ ᐆᒪᔪᕐᓄᑦ ᓇᔪᒐᐅᓂᖓᓂᒃ, ᐊᒻᒪᓗ ᕿᑭᖅᑖᓗᒻᒥᐅᑦ ᐊᕙᓂᖅᓱᐊᕐᒥᐅᓪᓗ ᓄᓇᓕᖏᑦ ᓱᓕ ᑕᑎᖃᓲᑦ ᓴᕐᕙᑉ ᐆᒪᔪᖃᕈᓘᔭᕐᓂᖓᓂᒃ.

ᐱᑭᐊᓚᓱᖅᓱᐊᖅ ᐱᒻᒪᕆᐅᕗᖅ ᐊᒥᓱᓄᑦ ᓅᑉᐸᑦᑐᓄᑦ ᓂᕐᔪᑎᓄᑦ ᑖᒃᑯᐊ ᓄᓇᓕᒻᒥᐅᑕᐅᔪᑦ ᐊᓯᖏᓪᓗ ᐅᖓᓯᓐᓂᖅᓴᒦᒃᑲᓗᐊᖅᑐᑦ ᓂᕿᖃᓲᖑᓪᓗᑎᑦ ᑕᒪᒃᑯᓂᖓ ᓂᕐᔪᑎᓂᑦ. ᓂᕐᔪᑏᑦ ᓴᕐᕙᕐᔪᐊᕐᒥ ᑕᑎᖃᓲᑦ ᓲᕐᓗᒃ ᑑᒑᓖᑦ, ᕿᓚᓗᒐᐃᑦ, ᐃᖃᓗᒃᐲᑦ, ᐊᐅᒃ, ᒥᑏᑦ, ᓇᐅᔭᑦ, ᑎᕋᑎᕋᑦ, ᓇᑦᑏᑦ, ᐅᒡᔪᑦ, ᓇᑦᓯᕙᒃ ᐊᒻᒪᓗ ᐊᓯᖏᑦ ᐳᐃᔩᑦ ᓇᓄᐃᑦ ᓂᕿᒋᓲᖏᑦ.

ᐊᕐᕌᒍᕋᑖᖑᓚᐅᖅᑐᓂᑦ, ᐅᑭᐅᖅᑕᖅᑐᒥ ᓄᖕᓂᖓ ᑲᐃᓐ ᐃᒪᖓᓂ, ᓂᐅᕐᔅ ᐃᑭᕋᓴᖓᓂ ᐊᒻᒪᓗ ᐃᑭᖓ ᐊᑐᕋᒃᓴᐅᙱᓐᓂᖅᓴᐅᓯᒪᓕᕐᒪᑕ ᐊᒻᒪᓗ ᓴᕐᕙᑉ ᖃᓄᐃᓕᖓᓂᖓ ᓇᓗᓇᕐᓂᖅᓴᐅᓯᒪᓕᖅᑐᓂ. ᑕᒪᒃᑯᐊ ᐊᓯᔾᔨᕐᓂᖏᑕ ᖃᓄᐃᑦᑑᓂᖏᑦ, ᑲᓱᖅᓯᒪᔪᑦ ᐊᖏᓂᖅᓴᒧᑦ ᓯᓚᑉ ᐊᓯᔾᔨᖅᓯᒪᓕᕐᓂᖓᓄᑦ ᖃᐅᔨᔭᐅᖃᑦᑕᖅᓯᒪᓕᖅᑐᓂᑦ ᐊᒥᓱᓂᑦ ᐅᑭᐅᖅᑕᖅᑐᒥ, ᖃᐅᔨᒪᔭᐅᙱᑦᑐᑦ.

ᑲᒥᓴᓐ ᒥᒃᓵᓄᑦ

ᐱᑭᐊᓚᓱᖅᓱᐊᖅ ᑲᒥᓴᙱᑦ ᐱᓇᓱᐊᒐᖃᖅᑎᑕᐅᓯᒪᔪᖅ ᐃᓄᐃᑦ ᓯᓚᕐᔪᐊᕐᒥᐅᑦ ᑲᑎᓯᒪᔨᖏᓐᓄᑦ ᑐᓴᕆᐊᕐᕕᖃᖃᑦᑕᖁᔭᐅᓯᒪᓪᓗᑎᑦ ᓄᓇᕗᒻᒥ ᑲᓛᖡᑦ ᓄᓈᓐᓂᓗ ᓄᓇᓕᖏᓐᓄᑦ ᐱᑭᐊᓚᓱᖅᓱᐊᑉ ᖃᓂᒋᔭᖏᓐᓃᑦᑐᓄᑦ.

ᐱᖓᓱᓂᑦ ᑲᒥᓯᓇᐅᔪᓄᑦ ᑲᒪᒋᔭᐅᓪᓗᓂ: ᓄᓇᕐᔪᐊᕐᒥ ᑭᒡᒐᖅᑐᐃᔪᖅ ᑲᒥᓯᓇ ᐅᑲᓕᖅ ᐃᔨᑦᓯᐊᖅ (ᐃᒃᓯᕙᐅᑕᖅ ᐃᓄᐃᑦ ᓯᓚᕐᔪᐊᕐᒥᐅᑦ ᑲᑎᒪᔨᖏᑦ), ᑲᓇᑕᒥ ᑲᒥᓯᓇ ᐄᕙ ᐋᕆᐊᒃ (ᓯᕗᓕᖅᑎᐅᓚᐅᖅᓯᒪᔪᖅ ᓄᓇᕗᒻᒥ) ᐊᒻᒪᓗ ᑲᓛᖡᑦ ᓄᓈᓐᓂᓕ ᑲᒥᓯᓇ ᑯᐱᒃ ᑭᓖᔅᑦ (ᑲᓛᖡᑦ ᓄᓈᓐᓂ ᓯᕗᓕᖅᑎᐅᓚᐅᖅᓯᒪᔪᖅ.

ᑲᒥᓯᓇᐅᔪᑦ ᑐᓴᕆᐊᕐᕕᖃᖅᐸᓚᐅᖅᑐᑦ ᐋᖅᑭᓱᖅᑕᐅᓯᒪᓪᓗᑎᑦ ᓄᓇᓕᓐᓂ ᐊᕕᑦᑐᖅᓯᒪᔪᓂᓪᓗ ᑐᓴᖃᑦᑕᓂᐊᕐᒪᑕ ᐅᖃᐅᓯᐅᔪᓂᑦ, ᐊᑐᓕᖅᑎᑦᑎᓗᑎᓪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂ, ᐊᒻᒪᓗ ᐊᑐᓕᖁᔨᓗᑎᑦ ᐃᓄᓐᓄᑦ ᖃᓄᖅᑑᕈᑎᓕᐊᕆᔭᐅᓯᒪᔪᓂᑦ ᐸᐸᑕᐅᖁᓪᓗᒍ, ᐅᐊᑦᑎᔭᐅᖁᓪᓗᒍ ᐊᒻᒪᓗ ᐊᐅᓚᑕᐅᖁᓪᓗ ᖃᓄᐃᑦᑕᐃᓕᓂᖓ ᐱᑭᐊᓚᓱᖅᓱᐊᑉ ᑭᖒᕚᓄᑦ ᐊᑐᖅᑕᐅᔪᓐᓇᓛᕐᒪᑦ. ᑐᓴᕆᐊᕐᕕᖃᖅᐸᓚᐅᖅᑐᑦ ᐃᓄᓕᒫᖅᑎᑎᓪᓗᑎᑦ ᑲᓇᑕᒥ ᐃᓄᐃᑦ ᓄᓇᓕᓐᓂ (ᐊᐅᓱᐃᑦᑐᖅ, ᖃᐅᓱᐃᑦᑐᖅ, ᐃᒃᐱᐊᕐᔪᒃ, ᒥᑦᑎᒪᑕᓕᒃ ᐊᒻᒪᓗ ᑲᖏᖅᑐᒑᐱᒃ) ᐊᒻᒪᓗ ᐅᐊᓐᓇᖓᓂ ᑲᓛᖡᑦ ᓄᓈᑦᑕ ᓄᓇᓕᖏᓐᓂ (ᓯᐅᕋᐸᓗᒃ, ᖄᓈᖅ, ᓴᕕᔅᓯᕕᒃ, ᑯᓪᓗᖅᓱᐊᖅ, ᓅᔅᓱᐊᖅ ᐊᒻᒪᓗ ᐅᐱᕐᓇᕕᒃ).

ᐅᖃᕐᕕᒋᔪᓐᓇᖁᓪᓗᒋᑦ ᑲᒥᓯᓇᐅᔪᑦ

ᐅᑲᓕᖅ ᐃᔨᑦᓯᐊᖅ, chair@inuitcircumpolar.com, +1 613-563-2642

ᑰᐱᒃ ᑭᓖᔅᑦ, kvk@ggnuuk.gl, +299 54 78 58

ᐄᕙ ᐋᕆᐊᒃ, eva.aariak@gmail.com, +1 867-222-8355

ᑐᒃᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒋᓗᒋᑦ

ᓯᑕᐸᓂ ᒦᑭᓐ, ᐃᓄᐃᑦ ᓯᓚᕐᔪᐊᕐᒥᐅᑦ ᑲᑎᒪᔨᖏᑦ ᑲᓇᑕ, smeakin@inuitcircumpolar.com; +1 613-791-1925

ᐊᓪᕗᕆᑦ ᔭᐃᑯᑉᓴᓐ, ᐃᒪᖓ ᐅᑭᐅᖅᑕᖅᑐᒥ ᑲᓛᖡᑦ ᓄᓈᓐᓂ, aerj58@gmail.com

ᓯᐊᕋ ᒪᒃᕘᑐᕐ, ᓄᓇᕐᔪᐊᕐᒥ ᐆᒪᔪᓕᕆᓂᕐᒧᑦ ᑮᓇᐅᔭᖃᕐᕕᖓ−ᑲᓇᑕ, smacwhirter@wwfcanada.org; +1 416-347-1894

ᑖᓐᓇ ᐅᓂᒃᑳᖅ ᐊᔪᕐᓇᙱᑦᑎᑕᐅᓚᐅᖅᑐᖅ ᐃᑲᔪᖅᓱᖅᑕᐅᓪᓗᓂ ᐃᒪᖓ ᐅᑭᐅᖅᑕᖅᑐᒥ ᑎᒥᖓ, ᓄᓇᕐᔪᐊᕐᒥ ᐆᒪᔪᓕᕆᓂᕐᒧᑦ ᑮᓇᐅᔭᖃᕐᕕᖓ, ᐆᒃ ᑎᒥᖓ, ᐊᒻᒪᓗ ᕕᐊᑎ ᐊᒻᒪᓗ ᒍᐊᑕᓐ ᒧᐊᕐ ᑎᒥᖓ.

ᐱᕙᓪᓕᐊᔪᑦ