ᐱᕙᓪᓕᐊᔪᑦ

ᐱᑭᐊᓚᓱᖅᓱᐊᖅ ᑲᒥᓴᖓ ᖁᕕᐊᓱᒍᑎᖃᖅᐳᑦ ᓴᐃᒪᓐ ᐃᑲᔪᖅᑐᐃᓂᖓᓂᒃ ᐃᓄᖕᓄᑦᑲᒪᒋᔭᐅᔪᒥᒃ ᐊᐅᓚᑦᑎᔪᖃᕐᓗᓂ ᐱᑭᐊᓚᓱᖅᓱᐊᕐᒥ

ᓂᐅ ᔪᐊᒃ - ᒥᐊᕆ ᓴᐃᒪᓐ, ᒥᓂᔅᑕ ᑭᐅᕈᓚᐃᓐ ᕕᐊᓇᑦ ᑭᒡᒐᖅᑐᐃᔨᒋᔭᖓ ᓴᒃᑯᐃᖅᑲᐅᕗᖅ ᑭᖑᓪᓕᖅᐹᕐᒥ ᐅᓂᒃᑳᓕᐊᖓᓂ ᐅᓪᓗᒥ. ᐅᓂᒃᑳᖅ ᐊᒥᓱᓂᑦ ᐱᒻᒪᕆᐅᔪᓂᑦ ᐅᖃᐅᓯᒃᓴᖃᖅᑐᖅ ᐊᑐᓕᖁᔨᓯᒪᓪᓗᓂᓗ ᒐᕙᒪᒃᑯᓐᓄᑦ ᐱᐅᓯᕚᓪᓕᖅᑎᑦᑎᖁᔨᓪᓗᓂ ᐃᓄᐃᑦ ᐃᓅᓯᖏᓐᓂᒃ. ᐱᑭᐊᓚᓱᖅᓱᐊᖅ ᑲᒥᓴᙵ ᐊᑕᐅᓯᖅ ᐊᑐᓕᖁᔨᓯᒪᔭᖓ ᖃᐅᔨᔭᒃᓴᐅᓛᖑᓚᐅᖅᐳᖅ. ᓴᐃᒪᓐ ᑲᓇᑕᒥ ᐊᖏᖁᔨᓚᐅᖅᑐᖅ ᐱᑭᐊᓚᓱᖅᓱᐊᖅ ᑲᒥᓴᙵᑕ ᐊᑐᖁᔭᖓᓂᒃ ᐋᖅᑮᔪᖃᕐᓗᓂ ᐃᓄᖕᓄᑦ ᑲᒪᒋᔭᐅᔪᒥᒃ ᐊᐅᓚᑦᑎᓂᕐᒧᑦ ᐸᕐᓇᐅᑎᒥᒃ ᐊᒻᒪᓗ ᐅᐊᑦᑎᔭᐅᔾᔪᑎᒃᓴᖏᓐᓂᑦ ᑕᒪᐃᓐᓄᑦ ᑲᓇᑕᑉ ᐅᑭᐅᖅᑕᖅᑐᖓᓂ ᓴᕐᕙᕐᔪᐊᓕᒫᕐᒧᑦ ᐊᒻᒪᓗ ᐃᓕᓴᕆᔭᐅᓗᓂ ᑕᒪᓐᓇ ᓄᓇᖃᖅᑳᖅᓯᒪᔪᓄᑦ ᓴᐳᔾᔭᐅᓕᕐᓗᓂ ᓄᓇᖓ ᐃᒪᖓᓗ.

ᐅᑲᓕᖅ ᐃᔨᑦᓯᐊᖅ, ᓄᓇᕐᔪᐊᕐᒥ ᐱᑭᐊᓚᓱᖅᓱᐊᖅ ᑲᒥᓴᙵᓃᙶᖅᑐᖅ ᐊᒻᒪᓗ ᐃᒃᓯᕙᐅᑕᕆᔭᐅᔪᖅ ᐃᓄᐃᑦ ᓯᓚᕐᔪᐊᕐᒥ ᑲᑐᔾᔨᖃᑎᒌᖏᓐᓄᑦ ᐅᖃᓚᐅᖅᑐᖅ, "ᐸᐸᑕᐅᓂᖏᑦ ᐅᑭᐅᖅᑕᖅᑐᑉ ᐃᒪᖏᑦ ᐱᒻᒪᕆᐊᓘᒻᒪᑦ ᐃᓄᓐᓄᑦ ᐊᒻᒪᓗ ᑐᙵᓱᐊᑎᑉᐸᕗᑦ ᐊᑐᖁᓯᒪᔭᖓ ᒥᔅ ᓴᐃᒪᓐ ᐅᓂᒃᑳᖓᓂᒃ ᐊᖏᖅᑕᐅᖁᓪᓗᓂᐅᒃ ᐱᑭᐊᓚᓱᖅᓱᐊᖅ ᑲᒥᓴᙵᑕ ᐊᑐᖁᓯᒪᔭᖓ ᐃᓄᖕᓄᑦ ᑲᒪᒋᔭᐅᓗᓂ ᐊᐅᓚᑕᐅᓗᓂᓗ ᐃᒪᖓ ᐊᒻᒪᓗ ᐅᐊᑦᑎᔾᔪᑎᒃᓴᖏᓐᓂᑦ ᐋᖅᑮᔪᖃᕐᓗᓂ ᑕᒪᐃᓐᓄᑦ ᐱᑭᐊᓚᓱᖅᓱᐊᕐᒧᑦ ᐅᕝᕙᓘᓐᓃᑦ ᐅᑭᐅᖅᑕᖅᑐᒥ ᓴᕐᕙᕐᔪᐊᖓᓄᑦ."

ᐄᕙ ᐋᕆᐊᒃ, ᑲᓇᑕᒥ ᐱᑭᐊᓚᓱᖅᓱᐊᖅ ᑲᒥᓴᙵᓃᖃᑕᐅᔪᖅ ᐅᖃᒃᑲᓐᓂᓚᐅᕆᓪᓗᓂ, "ᐃᓄᐃᑦ ᐃᒪᕐᒥᐅᑕᐅᓂᒃ ᐊᓐᓇᐅᒪᔾᔪᑎᖃᓲᖑᒻᒪᑕ ᐅᑭᐅᖅᑕᖅᑐᒥ ᐃᖏᕐᕋᔾᔪᑎᒋᓲᕆᓪᓗᑎᒍᑦ ᐊᒻᒪᓗ ᐳᐃᔩᑦ ᓂᕿᖃᕐᕕᒋᓲᕆᓪᓗᑎᒍᑦ. ᐃᓄᐃᑦ ᐃᓅᓯᖏᑦ ᐅᓪᓗᒥᐅᔪᖅ, ᑕᑎᖃᕐᒪᑕ ᓅᑉᐸᓪᓕᐊᓂᕐᒥᒃ, ᐊᒻᒪᓗ ᓅᑉᐸᓪᓕᐊᓲᖑᕗᑦ ᐅᑭᐅᖅᑕᖅᑐᑉ ᓯᑯᖓᓂ ᐊᒻᒪᓗ ᐃᒪᖓᓂ. ᑖᒃᑯᓂᖓ ᐆᒪᔪᕐᓂᑦ ᓅᑉᐸᓪᓕᐊᓲᓂᑦ ᓂᕐᔪᑎᖃᓲᖑᕗᒍᑦ, ᐊᒻᒪᓗ ᓱᓇᒃᑯᑖᕐᓂᑦ ᐊᑐᕆᐊᓕᑦᑎᓐᓂᑦ ᐱᓲᖑᓪᓗᑕ ᐊᓐᓄᕌᒃᓴᑦᑎᓐᓂ, ᐃᓕᖅᑯᓯᑦᑎᓐᓄᑦ ᐊᓯᐅᑦᑕᐃᓕᒪᔾᔪᑎᒋᓲᕆᓪᓗᒍ ᐊᑐᖅᑐᒍ ᑕᒪᓐᓇ, ᓲᕐᓗᒃ ᑭᓱᑐᐃᓐᓇᐃᑦ ᓴᓇᐅᒐᐅᓲᖑᓪᓗᑎᑦ. ᓅᑉᐸᓪᓕᐊᓂᖃᓲᖑᒐᑦᑕ ᓯᑯᒃᑯᑦ ᐃᓄᐃᑦ ᓄᓇᓕᖏᑕ ᖃᓂᒋᔭᖏᓐᓃᑦᑐᒃᑯᑦ ᐊᒻᒪᓗ ᑲᓱᖅᑎᑦᑎᓲᖑᓪᓗᓂ ᐃᓄᐃᑦ ᓄᓇᓕᖏᓐᓂᑦ. ᐅᑭᐅᒃᑯᑦ, ᐊᖅᑯᑎᑯᑖᕆᕙᕗᑦ ᓯᑯ. ᐊᐅᔭᒃᑯᑦ, ᐃᒪᐅᓪᓗᓂ. ᑕᒪᓐᓇ ᑲᓱᖅᓯᒪᓂᖃᕐᓂᕗᑦ ᓄᓇᒧᑦ ᐃᒪᕐᒧᓪᓗ ᐃᓄᖕᓂᑦ ᐅᐱᒍᓱᓕᖅᑎᑦᑎᓯᒪᔪᖅ, ᓄᓇᓕᖁᑎᕗᑦ ᖃᓄᐃᑦᑕᐃᓕᒪᓂᖅᓴᐅᓪᓗᓂᓗ, ᐊᒻᒪᓗ ᐅᑉᐱᕐᓂᒃᑯᑦ ᑲᓱᖅᓯᒪᓂᖃᕈᓐᓇᐅᑎᒋᓲᕆᓪᓗᑎᒍᑦ ᐅᐊᑦᑎᐊᕈᒧᑦ."

"ᓄᑕᖅᑲᕗᑦ ᖃᐅᔨᒪᔪᓐᓃᕐᒪᑕ ᓄᓇᐃᑦ ᐊᑎᖏᓐᓂᑦ ᐊᖑᓇᓱᕝᕕᒋᓲᑦᑕᑦᑕ, ᐊᐅᓪᓚᓚᐅᖅᓯᒪᙱᒻᒪᕆᑦᑐᓪᓘᓐᓃᑦ ᓯᑯᒃᑯᑦ ᑲᓱᖅᑎᑦᑎᓯᒪᔪᑎᒍᑦ ᓄᓇᐅᔪᓄᑦ." - "ᑕᐃᒪᓐᓇ ᑐᓴᖃᑦᑕᕐᓂᑰᕙᓚᐅᖅᑐᒍᑦ ᓄᓇᓕᓐᓂ ᐱᑭᐊᓚᓱᖅᓱᐊᑉ ᖃᓂᒋᔭᖏᓐᓃᑦᑐᓂᑦ," ᐅᖃᒃᑲᓐᓂᖅᑐᓂ ᑰᐱᒃ ᑭᓖᔅᑦ, ᐱᑭᐊᓚᓱᖅᓱᐊᖅ ᑲᒥᓴᙵᓃᑦᑐᖅ ᑭᒡᒐᖅᑐᐃᓪᓗᓂ ᑲᓛᖡᑦ ᓄᓈᓐᓂ. ᐱᑭᐊᓚᓱᖅᓱᐊᖅ, ᐅᕝᕙᓘᓐᓃᑦ "ᓴᕐᕙᕐᔪᐊᖅ", ᐊᖏᓛᖑᕗᖅ ᐅᑭᐅᖅᑕᖅᑐᒥ ᓴᕐᕙᖏᓐᓂ ᐊᒻᒪᓗ ᐆᒪᔪᖃᕐᓂᖅᐹᖑᓪᓗᓂ ᐅᑭᐅᖅᑕᖅᑐᓕᒫᕐᒥ ᓄᓇᕐᔪᐊᕐᒥ. ᐱᑭᐊᓚᓱᖅᓱᐊᖅ ᐃᓕᓴᕆᔭᐅᓯᒪᕗᖅ ᐃᓄᖕᓄᑦ ᐊᒥᓱᓄᑦ ᐊᕐᕌᒎᓕᖅᑐᓄᑦ ᐆᒪᔪᕐᓄᑦ ᓇᔪᒐᕆᔭᐅᓂᖓᓄᑦ. ᓄᓇᓕᐅᔪᑦ ᕿᑭᖅᑖᓗᒻᒥ ᐊᒻᒪᓗ ᐊᕙᓂᖅᓱᐊᕐᒥ ᑲᓇᑕᒥ ᑲᓛᖡᑦ ᓄᓈᓐᓂᓗ ᓴᕐᕙᕐᔪᐊᑉ ᐆᒪᔪᖃᕐᓂᖓᓂᒃ ᑕᑎᖃᖃᑦᑕᖅᑐᑎᑦ. ᐱᑭᐊᓚᓱᖅᓱᐊᖅ ᐱᒻᒪᕆᐅᕗᖅ ᐊᒥᓱᓄᑦ ᐆᒪᔪᕐᓄᑦ ᑕᒪᐅᙵᖃᑦᑕᓲᖑᓪᓗᑎᑦ ᑖᒃᑯᐊᓗ ᓄᓇᓕᐅᔪᑦ, ᐊᒻᒪᓗ ᓄᓇᕐᔪᐊᕐᒥ ᓇᑭᕈᓘᔮᖓᔪᑦ, ᑕᑎᒋᔭᐅᓲᖑᓪᓗᓂ. ᐊᕐᕌᒍᕋᑖᖑᔪᓂᑦ, ᐅᑭᐅᖅᑕᖅᑐᒥ ᓯᑯ ᐃᑳᕈᑎᖓ ᑲᐃᓐ ᕙᐃᓴᓐ ᕿᑭᖅᑖᓘᑉ ᑲᖏᖅᑐᐊᓂ, ᓂᐅᕐᔅ ᐃᑭᕋᓴᖓᓂ ᐊᒻᒪᓗ ᓯᒥᑦ ᐃᒪᖓᓂ (ᐃᑭᖅ) ᐊᑐᕋᒃᓴᐅᙱᓗᐊᖃᑦᑕᕐᓂᑰᓕᖅᐳᖅ ᐊᒻᒪᓗ ᓴᕐᕙᕐᔪᐊᖅ ᖃᐅᔨᔭᒃᓴᐅᒍᓐᓃᕐᓂᖅᓴᐅᓪᓗᓂ ᓇᐅᒃᑰᖓᓂᖓᓂᒃ. ᑖᒃᑯᐊ ᐊᓯᔾᔨᕐᓂᖏᓐᓄᑦ, ᓯᓚᑉ ᐊᓯᔾᔨᖅᑐᒥᓂᐅᓂᖓᓄᓪᓗ ᖃᐅᔨᔭᒃᓴᐅᓲᑦ ᐊᒥᓱᓂᑦ ᐅᑭᐅᖅᑕᖅᑐᒥ, ᖃᐅᔨᒪᔭᐅᒍᓐᓃᖅᑐᑦ.

ᐃᔨᑦᓯᐊᖅ ᐅᖃᖅᑐᓂ, "ᐃᓄᐃᑦ ᓯᓚᕐᔪᐊᕐᒥ ᑲᑐᔾᔨᖃᑎᒌᒋᑦ ᐱᒋᐊᖅᑎᑦᑎᓚᐅᖅᓯᒪᔪᑦ ᐱᑭᐊᓚᓱᖅᓱᐊᖅ ᑲᒥᓴᙵᓂ ᑲᒪᒋᔭᐅᖁᓪᓗᒍ ᑕᒪᓐᓇ ᐆᒪᔪᐃᑦ ᓄᓇᐃᓪᓗ ᐃᒪᖓᓗ ᐃᑲᔪᖅᑐᐃᖃᑦᑕᕐᓂᑰᓪᓗᓂ ᑕᒪᓐᓇ ᐃᓄᐃᑦ ᓄᓇᓕᖏᓐᓂ ᐊᕐᕌᒍᓄᑦ ᐊᒥᓱᒐᓴᓐᓄᑦ ᐊᒻᒪᓗ ᓯᓚᑉ ᐊᓯᔾᔨᕐᓂᖓᓄᑦ ᐊᑦᑕᓇᖅᑐᒨᓕᖅᑐᓂ ᐊᒻᒪᓗ ᑮᓇᐅᔭᓕᐅᕋᓱᐊᖅᐸᑦᑐᓄᑦ ᐅᓯᑲᖅᑕᖅᑎᓄᓪᓗ ᖃᓄᐃᓕᐅᕐᕕᐅᖃᑦᑕᕐᓂᑯᖓᓄ ᐱᓪᓗᒍ". ᐱᑭᐊᓚᓱᖅᓱᐊᖅ ᑲᒥᓴᙵᑕ ᑎᑭᓐᓇᓱᐊᖅᑕᖓ ᖃᐅᔨᓴᕈᑕᐅᓯᒪᔪᑦ ᓇᓗᓇᐃᒃᑯᑕᖏᓐᓂᑦ ᓴᖅᑮᓇᓱᐊᖅᑐᑎᑦ, ᑐᙵᕕᒋᔭᐅᓪᓗᐊᕐᓂᐊᖅᑐᓂ ᐊᑐᓕᖁᔭᖏᓐᓂᓪᓗ ᓴᖅᑮᓗᑎᑦ ᐊᒻᒪᓗ ᐃᓄᐃᑦ ᑐᑦᑕᕐᕕᐅᒐᓗᐊᕐᒪᖔᑕ ᐱᑭᐊᓚᓱᖅᓱᐊᑉ ᓯᕗᓂᒃᓴᖓᓄᑦ ᐊᒻᒪᓗ ᐃᓄᐃᑦ ᑕᐅᑐᙳᐊᕐᓂᖓᓂᒃ ᐊᐅᓚᑕᐅᓂᒃᓴᖓᓄᑦ ᐊᑐᖅᑕᐅᔪᖃᓕᕐᓗᓂ.

ᖃᐅᔨᒪᑦᑎᐊᖅᑐᑯᓘᓂᖏᑦ ᓄᓇᖃᖅᑳᖅᓯᒪᔪᑦ ᐊᒻᒪᓗ ᑐᑭᓯᐅᒪᑦᑎᐊᖅᓯᒪᓂᖏᑦ ᑕᒪᔅᓱᒥᖓ ᑲᑎᑕᐅᔪᓐᓇᕐᒪᑕ ᐊᒻᒪᓗ ᐊᑐᓕᖅᑎᑕᐅᓗᑎᑦ ᐊᒥᓱᑎᒍᑦ, ᖃᓄᖅᑑᖅᓯᒪᔪᒃᑯᑦ. ᐅᑭᐅᖅᑕᖅᑐᒦᓛᖑᔪᑦ ᓄᓇᓕᐅᔪᑦ ᐊᑐᓲᖑᒻᒪᑕ ᐱᑭᐊᓚᓱᖅᓱᐊᕐᒥ ᐊᒻᒪᓗ ᐃᓚᐅᖃᑕᐅᓚᐅᖅᓯᒪᓪᓗᑎᑦ ᐅᑭᐊᒃᓵᖅ 2016-ᒥ ᐃᓄᓕᒫᖅᑎᑦᑎᑎᓪᓗᒋᑦ ᐊᒻᒪᓗ ᐃᓄᖕᓂᒃ ᓯᕗᒃᑲᑕᖅᑎᖃᕐᓗᑎᑦ ᐊᐅᓚᑕᐅᖁᔨᓯᒪᓕᖅᑐᒥᓂᐅᓪᓗᑎᑦ ᑕᐃᑲᓂ ᐃᓄᓕᒫᖅᑎᑦᑎᑎᓪᓗᒋᑦ ᐊᒻᒪᓗ ᐅᐊᑦᑎᔭᐅᓂᒃᓴᖓᓂᑦ ᑕᒪᔅᓱᒪᑉ ᐱᒻᒪᕆᐅᔪᑉ ᑕᕆᐅᑉ.

"ᑲᒥᓴᓐᒃᑯᑦ ᑐᙵᕕᒃᓴᓕᐅᖅᐳᑦ ᐃᓄᖕᓄᑦ ᑲᒪᒋᔭᐅᔪᒥᒃ ᐅᐊᑦᑎᔭᐅᓂᒃᓴᖓᑕ ᐸᕐᓇᐅᑎᓂᖓᓂᒃ ᐃᑲᔪᖅᑐᐃᓂᖃᕋᔭᖅᑐᖅ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂᑦ ᓄᓇᖃᖅᑳᖅᓯᒪᔪᓄᑦ ᐊᑐᐊᒐᒃᓴᓕᐅᖅᑕᐅᓯᒪᓗᓂ/ᐊᐅᓚᑕᐅᓗᓂ ᑐᑦᑕᕐᕕᒋᔭᐅᒐᔭᖅᑐᖅ ᑕᒪᓐᓇ ᐃᓱᒪᒋᔭᐅᓯᒪᓂᖓ ᐃᓄᖕᓄᑦ ᑲᒪᒋᔭᐅᔪᖅ ᐊᐅᓚᑕᐅᓂᖓ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᐊᑐᖅᑕᐅᓲᑦ ᓄᓇᐃᑦ ᐃᒪᐃᓪᓗ ᓴᐳᔾᔭᐅᓯᒪᓂᖏᓐᓄᑦ ᓄᑖᖑᓗᓂ ᐊᔾᔨᐅᙱᑦᑑᒐᔭᖅᑐᓂ ᐊᒻᒪᓗ ᐊᐅᓚᓂᖃᑦᑎᐊᖅᑐᒃᑯᑦ ᑲᒪᒋᔭᐅᒋᐊᙵᕐᓗᓂ ᓇᒻᒥᓂᖅᓱᕈᓐᓇᓕᖁᓪᓗᒋᑦ," ᐅᖃᖅᑐᓂ ᑭᓖᔅᑦ.

ᑭᓖᔅᑦ ᐅᖃᒃᑲᓐᓂᖅᑐᓂ, "ᑲᒥᓴᓐᒃᑯᑦ ᓂᐅᕐᕈᓚᐅᖅᓯᒪᔪᑦ ᑕᒪᒃᑮᓐᓂᒃ ᑲᓇᑕᑉ ᖁᑦᑎᒃᑐᖓᑕ ᓄᓇᓕᖏᓐᓄᑦ ᐊᐅᓱᐃᑦᑐᕐᒥ ᒥᑦᑎᒪᑕᓕᒻᒥᓗ ᐊᒻᒪᓗ ᑐᓴᓚᐅᖅᓯᒪᓪᓗᑎᑦ ᖃᐅᔨᒪᔨᐅᔪᓂᑦ ᖃᐅᓱᐃᑦᑐᒥ, ᑲᖏᖅᑐᒑᐱᖕᒥ ᐊᒻᒪᓗ ᐃᒃᐱᐊᕐᔪᖕᒥ. ᐊᐅᓪᓚᓚᐅᖅᓯᒪᒋᓪᓗᑕ ᖄᓈᕐᒧᑦ ᐊᒻᒪᓗ ᓯᐅᕋᐸᓗᒻᒧᑦ−ᐅᑭᐅᖅᑕᖅᑐᑉ ᐅᐊᖕᓇᖓᓃᓐᓂᖅᐹᑦ ᓄᓇᕐᔪᐊᕐᒥ ᐊᒻᒪᓗ ᑕᐅᓄᖓ ᓯᔾᔭᖏᓐᓄᑦ ᐃᓗᐃᓪᓕᒥ ᑲᓛᖡᑦ ᓄᓇᓕᖏᓐᓄᑦ ᐱᑭᐊᓚᓱᖅᓱᐊᕐᒥ ᐊᑐᓲᕐᓄᑦ. ᑲᔾᔮᓇᕐᓂᖅᐹᖑᖃᑕᐅᔪᑦ ᓄᓇᓕᖏᑦ ᑕᒫᓂ ᒥᕝᕕᖃᙱᒻᒪᑕ. ᐃᒪᖅ ᑲᓱᕈᑎᒋᓲᕆᕚ ᐊᓯᖏᓐᓄᑦ ᓄᓇᕐᔪᐊᕐᒥᐅᑕᓄᑦ."

ᐊᖑᓇᓱᒃᑏᑦ ᑕᒫᓂᕐᒥᐅᑕᓕᒫᖑᔪᑦ ᓄᓇᓕᓐᓂ ᑲᑐᔾᔨᔪᓐᓇᑦᑎᐊᓚᐅᖅᑐᖅ ᑲᒥᓴᓐᒃᑯᓐᓄᑦ ᖃᐅᔨᒪᓂᖏᓐᓂᑦ. ᑐᓴᖅᑕᐅᖃᑦᑕᐃᓐᓇᖅᐸᓚᐅᖅᑐᑦ ᐅᑯᐊ: ᐊᓯᔾᔨᖅᑕᐃᓐᓇᓗᐊᕐᓂᖓ, ᓇᓗᓇᓕᕐᓂᖓ ᐊᔾᔨᒌᓐᓇᕈᓐᓃᕐᓂᖓᓄᑦ ᓇᓚᐅᑦᑖᕋᒃᓴᐅᒍᓐᓃᖅᑐᓂ; ᐊᓯᔾᔨᕐᓂᖏᑦ ᐆᒪᔪᐃᑦ ᓅᖃᑦᑕᕐᓂᖏᑦ, ᓄᑖᑦ ᐆᒪᔪᐃᑦ ᑕᒪᐅᙵᖃᑦᑕᓕᖅᑐᑦ, ᓯᑯᒍᓐᓇᐃᓕᓪᓗᓂ ᓯᑯᖃᕆᐊᖃᕋᓗᐊᖅᑎᓪᓗᒍ ᐃᓚᖓ. ᐅᖃᐅᓯᖃᓚᐅᕐᒥᔪᑦ ᓂᕈᐊᖅᑕᐅᓯᒪᔪᑦ ᐊᓯᔾᔨᖅᓯᒪᓕᕐᓂᖏᑦ. ᑕᑯᒃᓴᐅᙱᑦᑑᒐᓗᐊᕐᓂᑦ ᑭᓪᓕᖃᖅᑎᑕᐅᓕᕐᓂᖏᑦ ᐃᓛᒃᑰᖓᓕᖅᑐᑎᑦ ᒫᓐᓇᕈᓗᒃ ᐃᑳᕈᓐᓇᓚᐅᖅᓯᒪᒐᓗᐊᖅᑎᓪᓗᒋᑦ ᓴᕐᕙᕐᔪᐊᑉ ᓯᑯᖓᑎᒍᑦ ᑲᓱᖅᑎᑦᑎᓯᒪᔪᖅ ᐅᒥᒻᒪᑦ ᓄᓈᑦ ᐊᒻᒪᓗ ᑲᓛᖡᑦ ᓄᓈᑦ, ᑲᓱᖅᑎᑕᐅᓯᒪᓪᓗᑎᒃ ᑖᒃᑯᐊᒃ ᑲᓇᓐᓇᕐᒥ ᓄᓇᓕᐅᔪᑦ ᐱᑭᐊᓚᓱᖅᓱᐊᕐᒥ ᐊᖑᓇᓱᕝᕕᖏᓐᓄᑦ ᐅᒥᒻᒪᑦ ᓄᓈᓐᓄᑦ.

ᐃᔨᑦᓯᐊᖅ ᐅᖃᖅᑐᓂ, "ᑐᓴᖃᑦᑕᐃᓐᓇᓚᐅᕋᑦᑕ ᓄᓇᓕᓕᒫᕐᓂᑦ ᐃᓄᐃᑦ ᑕᒫᓃᑦᑐᑦ ᐅᐊᑦᑎᑦᑎᐊᓛᖑᒍᓐᓇᕐᒪᑕ ᐊᐅᓚᑦᑎᓗᑎᓪᓗ ᑕᒪᔅᓱᒥᖓ. ᓄᓇᓕᐅᔪᑦ ᓯᕗᓕᖅᑎᐅᔪᒪᕗᑦ ᐊᒻᒪᓗ ᐋᖅᑮᓗᑎᑦ ᖃᓄᐃᑦᑐᓂᑦ ᖃᐅᔨᓴᕈᑕᐅᖃᑦᑕᓂᐊᖅᑐᓂᑦ, ᖃᐅᔨᓴᕐᓗᑎᑦ ᐊᓯᔾᔨᕐᓂᖏᑕ ᓇᓗᓇᐃᒃᑯᑕᖏᓐᓂᒃ ᐊᒻᒪᓗ ᐋᖅᑮᓗᑎᑦ ᐊᑐᕋᒃᓴᓂᑦ ᐊᖑᓇᓱᓐᓂᕐᒧᑦ ᐊᑐᐊᒐᕋᓛᖏᓐᓂᑦ ᓄᓇᓕᖏᓐᓂ ᒪᑭᒪᑎᑦᑎᔪᓐᓇᕐᓂᐊᖅᑐᓂᑦ. ᐃᓄᐃᑦ ᑕᒪᒃᑮᓐᓂᒃ ᓄᓇᓕᕐᔪᐊᓂᒃ ᐅᖃᖅᓯᒪᓕᖅᐳᑦ ᓅᑲᑕᖃᑦᑕᕈᒪᒻᒪᑕ ᓇᓕᐊᓐᓄᕋᕈᓐᓇᕐᓗᑎᑦ, ᑕᐃᒫᒃᓴᐃᓐᓇᖅ, ᐃᓄᐃᑦ ᐱᑭᐊᓚᓱᖅᓱᐊᖓᓄᑦ ᐊᒻᒪᓗ ᐃᖅᑲᓇᐃᔭᖃᑎᒌᑦᑎᐊᓂᖅᓴᐅᓗᑎᑦ ᐊᔾᔨᒌᑦᑐᒥᒃ ᑕᐅᑐᙳᐊᖅᑕᒥᓄᑦ ᑎᑭᑦᑎᒍᒪᓪᓗᑎᑦ ᑲᑐᔾᔨᓗᑎᑦ ᓄᓇᓃᙶᖅᑐᓂᑦ ᐃᒪᓂᓪᓗ ᐊᒻᒪᓗ ᐃᓄᖕᓄᑦ ᑲᒪᒋᔭᐅᔪᒥᒃ ᐊᐅᓚᑦᑎᓗᑎᑦ ᐱᑭᐊᓚᓱᖅᓱᐊᕐᒥ. ᐊᔾᔨᒌᑦᑐᒡᒍᑕᐅᔪᑦ ᐃᓱᒫᓘᑎᒋᔭᐅᓯᒪᔪᑦ ᐳᓚᕋᖅᑐᓕᕆᓂᖅ ᐱᓕᕆᓂᖅᓴᐅᓕᖅᑐᖅ, ᐅᓯᑲᖅᑕᖅᑐᑦ, ᐃᖃᓗᒐᓱᓲᑦ, ᓄᓇᓃᙶᖅᑐᓂᑦ ᐃᒪᕐᓂᓗ ᖃᐅᔨᓴᖃᑦᑕᖅᑐᑦ ᐊᒻᒪᓗ ᖄᖅᑎᑦᑎᖃᑦᑕᖅᑐᑦ ᐃᖅᑲᒥ ᖃᐅᔨᓴᖅᑐᑎᑦ ᑕᒪᒃᑯᐊ ᐃᓱᒫᓘᑎᒋᔭᐅᔪᐃᓐᓇᐅᕗᑦ ᑕᒪᒃᑮᓐᓂᒃ ᓄᓇᓕᕐᔪᐊᓂᒃ ᐱᑭᐊᓚᓱᖅᓱᐊᕐᒥᐅᑕᓂᑦ. ᓱᖅᑯᐃᓇᑦᑎᐊᓛᖑᔪᖅ, ᐃᓄᐃᑦ ᐸᐸᑦᑎᔨᐅᒃᑲᓐᓂᕈᒪᔪᑦ ᓴᕐᕙᕐᔪᐊᕐᒧᑦ ᐱᓕᕆᖃᑎᒌᓪᓗᑎᑦ ᐃᓄᐃᑦ ᐃᓅᓂᖃᕐᓂᖏᓐᓄᑦ, ᐊᕕᑕᐅᓯᒪᒐᓗᐊᖅᑐᑎᑦ ᓄᓇᓕᕐᔪᐊᓐᓄᒃ, ᐊᑕᐅᓯᕐᒥᒃ ᑕᕆᐅᕐᒥ."

ᐋᕆᐊᒃ ᐅᖃᖅᑐᓂ, "ᐃᓄᖕᓄᑦ ᒪᑭᒪᔪᓐᓇᖅᑐᒃᑯᑦ ᐊᑐᕐᓗᑎᑦ ᐃᒪᕐᒦᙶᖅᑐᓂᑦ ᐊᒻᒪᓗ ᐅᑭᐅᖅᑕᖅᑐᑉ ᑕᕆᐅᖓᑕ ᓯᕗᓂᒃᓴᖓ ᓯᑯᖓᓗ ᐊᑲᕐᕆᔮᕈᑎᑐᐃᓐᓇᐅᙱᒻᒪᑦ − ᐃᓅᔾᔪᑎᒋᔭᐅᕗᖅ, ᓴᐳᔾᔨᔾᔪᑎᒋᔭᐅᒐᔭᖅᑐᖅ ᐃᓕᖅᑯᓯᑦᑎᓐᓄᑦ. ᐃᓄᐃᑦ ᐊᓯᔾᔨᕐᓂᐅᔪᓄᑦ ᓱᖏᐅᑎᕙᓪᓕᐊᒻᒪᑕ ᐊᒻᒪᓗ ᐱᕈᖅᐸᓪᓕᐊᖏᓐᓇᕐᓂᐊᖅᑐᑕ ᐊᓯᔾᔨᖅᐸᓪᓕᐊᔪᒥᒃ ᐅᑭᐅᖅᑕᖅᑐᒥ."

• Read Mary Simon's report - A new Shared Arctic Leadership Model

ᑐᑭᓯᒋᐊᒃᑲᓐᓂᕐᕕᒃᓴᑦ:

ᑭᐅᕈᓪ ᓴᐃᒪᓐ
ᐃᓄᐃᑦ ᓯᓚᕐᔪᐊᕐᒥᐅᑦ ᑲᑐᔾᔨᖃᑎᒌᖏᑦ ᑲᓇᑕᒥ
csimon@inuitcircumpolar.com
613-563-2642

ᓯᑕᐸᓂ ᒦᑭᓐ
ᐃᓄᐃᑦ ᓯᓚᕐᔪᐊᕐᒥᐅᑦ ᑲᑐᔾᔨᖃᑎᒌᖏᑦ ᑲᓇᑕᒥ
smeakin@inuitcircumpolar.com
613-791-1925