ᐱᕙᓪᓕᐊᔪᑦ

ᐱᑭᐊᓚᓱᕐᓱᐊᖅ ᓯᕗᓕᖅᑎᖏᓐᓄᑦ ᐅᓂᒃᑳᑦ

ᑲᑎᒪᔨᐅᖃᑎᒌᑦᑐᑦ ᐊᖏᖃᑎᒌᓐᓂᑯᑦ, ᐋᖅᑭᒃᑕᐅᓯᒪᔪᑦ ᒪᓕᑦᑐᒋᑦ ᑲᑎᒪᔨᖏᑦ ᐆᒪᔪᐃᑦ ᐊᔾᔨᒌᙱᓐᓂᖏᓐᓂᒃ, ᐊᑐᓕᓚᐅᖅᑐᑦ ᐊᖏᖅᑐᑎᑦ ᖃᓄᖅᑑᕈᑎᓕᐅᖅᑕᐅᓯᒪᔪᒥᒃ ᐸᕐᓇᐅᑎᒥᒃ ᐆᒪᔪᐃᑦ ᐊᔾᔨᒌᙱᑦᑑᓂᖏᓐᓂᒃ 2011–2020 ᐊᑯᓂᐅᓂᕆᓂᐊᖅᑕᖓᓂᒃ, ᓴᐳᔾᔭᐅᑎᑦᑎᔪᑦ ᓯᔾᔭᐃᑦ ᐊᒻᒪᓗ ᐃᒪᐃᓪᓗ, ᐱᓗᐊᖅᑐᒥᒃ ᐱᒻᒪᕆᐅᔪᑦ ᐊᔾᔨᒌᙱᑦᑐᓄᑦ ᐆᒪᔪᕐᓄᑦ ᐊᒻᒪᓗ ᓇᔪᒐᖏᓐᓄᑦ ᐱᔨᑦᑎᕋᕈᑎᖃᓲᑦ ᐱᓪᓗᒋᑦ, ᐊᐅᓚᓂᖃᑦᑎᐊᑐᒃᑯᑦ ᐊᒻᒪᓗ ᐊᐅᓚᑕᐅᑦᑎᐊᕐᓗᑎᑦ, ᐊᕙᑎᓕᕆᕙᑦᑐᓄᑦ ᑭᒡᒐᖅᑐᐃᔨᖃᐅᑦᑎᐊᖅᓯᒪᔪᓂᒃ ᐊᒻᒪᓗ ᑲᓱᖅᓯᒪᐅᖅᑎᐊᖅᑐᓂᑦ ᓴᐳᔾᔭᐅᓯᒪᔪᓂᑦ ᐊᒻᒪᓗ ᐊᓯᖏᓐᓂᒃ ᐊᐅᓚᓂᖃᑦᑎᐊᖅᑐ ᑦᓄᓇᕐᓂᒃ ᐃᒪᕐᓂᓗ ᑐᙵᕕᓖᑦ ᐸᐸᑦᑎᒍᑎᖃᐅᕋᓱᐊᖅᓯᒪᐅᕐᓗᑎᑦ. ᓄᓇᕐᔪᐊᕐᒥ ᐆᒪᔪᐃᑦ ᐊᔾᔨᒌᙱᓐᓂᖏᓐᓄᑦ ᑎᑭᑕᐅᓇᓱᐊᖁᓪᓗᒋᑦ, ᑲᓇᑕᒥ ᒐᕙᒪᒃᑯᑦ ᓯᕗᒧᐊᑦᑎᑦᑎᓯᒪᔪᑦ ᐊᒥᓱᓂᑦ ᓇᓖᕌᕋᒃᓴᓂᑦ ᐃᒪᖅ ᓴᐳᔾᔭᐅᓗᓂ ᐅᑭᐅᖅᑕᖅᑐᒥ ᑭᓯᐊᓂᓗ ᑖᒃᑯᑑᙱᑦᑐᑦ: ᑕᓪᓗᕈᑎᐅᑉ ᐃᒪᖓ, ᑐᕙᐃᔪᐃᑦᑐᖅ. ᐱᕙᓪᓕᐊᒍᑎᒋᔭᐅᓂᖓ ᑐᙵᕕᓕᐅᕐᓗᑎᑦ ᐸᐸᑦᑎᓂᕐᒧᑦ ᐊᐅᓚᑦᑎᓂᕐᒧᓪᓗ ᐱᑭᐊᓚᓱᖅᓱᐊᕐᒥ ᐃᑲᔪᕐᓂᖃᕋᔭᖅᑐᖅ ᑎᑭᑦᑎᓗᑎᑦ ᑕᒪᒃᑯᓂᖓ ᐆᒪᔪᕐᓂᒃ ᐊᔾᔨᒌᙱᑦᑐᓂᒃ ᐱᓪᓗᒋᑦ ᑎᑭᑕᐅᓇᓱᐊᖅᑐᓂᒃ ᓯᕗᓂᒃᓴᒥ.

ᐱᑭᐊᓚᓱᖅᓱᐊᖅ ᑐᑭᓕᒃ “ᓴᕐᕙᖅ” ᑲᓛᖠᓱᑦ, ᐊᖏᓛᖑᕗᖅ ᓴᕐᕙᖅ ᐅᑭᐅᖅᑕᖅᑐᒥ ᐊᒻᒪᓗ ᐆᒪᔪᐃᑦ ᐊᒥᓲᓛᖑᓪᓗᑎᑦ ᐅᑭᐅᖅᑕᖅᑐᑉ ᑭᒡᓕᙳᐊᖓᑕ ᐅᐊᖕᓇᖓᓂ. ᐃᒪᕐᒦᑦᑐᓂ ᓄᓇᕗᑦ ᓇᒻᒥᓂᖁᑎᒋᔭᖓᓂᒃ, ᑲᓇᑕ, ᑲᓛᖡᑦ ᓄᓈᑦ, ᐊᒻᒪᓗ ᑎᐊᓐᒫᒃ ᒐᕙᒪᕐᔪᐊᖓᓂᒃ, ᐃᑲᔪᖅᑐᐃᖃᑦᑕᖅᓯᒪᕗᖅ ᐃᓄᖕᓂᒃ ᑕᒫᓂ ᑕᐃᒪᙵᓕᒫᖅ; ᓂᕿᖃᕐᕕᐅᓪᓗᓂ ᐊᖑᓇᓱᕝᕕᐅᕙᒃᖢᓂ, ᐊᒻᒪᓗ ᐊᐅᓪᓚᕐᕕᐅᕙᑦᑐᓂ ᑲᓱᖅᑎᑦᑎᓲᖅ ᐃᓄᐃᑦ ᓄᓇᓕᖏᓐᓂ. ᐱᑭᐊᓚᓱᖅᓱᐊᖅ ᐊᔭᐅᕆᔪᓐᓇᕐᓂᖓ ᐊᒻᒪᓗ ᐱᒻᒪᕆᐅᓂᖓ ᐅᖓᑕᐅᔨᕗᖅ ᑭᒡᓕᖏᓐᓂ ᐊᖏᓂᖅᓴᒻᒪᕆᖕᒧᑦ ᐃᓕᖅᑯᓯᖃᕐᕕᐅᔪᓄᑦ ᐆᒪᔪᖃᕐᕕᐅᔪᓄᓪᓗ ᐊᓯᔾᔩᓐᓇᖅᑐᒧᑦ ᓴᕐᕙᒧᑦ, ᐃᑲᔪᖅᑐᐃᔪᖅ ᓄᓇᕐᔪᐊᕐᒥ ᐆᒪᔪᐃᑦ ᐱᒻᒪᕆᐅᔪᓄᑦ. ᒫᓐᓇᓕ, ᐱᑭᐊᓚᓱᖅᓱᐊᖅ ᐊᒻᒪᓗ ᐃᖃᓄᐃᑦ ᑕᑎᖃᖅᑐᑦ ᑖᒃᑯᓂᖓ ᐊᑦᑕᓇᖅᑐᒨᑐᐃᓐᓇᕆᐊᖃᓕᖅᑐᑦ ᓯᓚᑉ ᐊᒻᒪᓗ ᐊᕙᑎ ᐊᓯᔾᔨᐸᓪᓕᐊᓂᖓᓄᑦ ᐊᒻᒪᓗ ᐃᓄᖕᓄᑦ ᐅᐸᒃᑕᐅᓂᖅᓴᐅᖃᑦᑕᓕᖅᑐᓂ.

ᐃᓄᐃᑦ ᓄᓇᓕᖏᑦ ᓄᓇᕗᒻᒥ, ᑲᓇᑕ ᐊᒻᒪᓗ ᑲᓛᖡᑦ ᓄᓈᓐᓂ ᐱᑭᐊᓚᓱᖅᓱᐊᕐᒨᖓᓂᖅᓴᐃᑦ ᐃᓱᒫᓘᑎᒥᓂᒃ ᐅᖃᐅᓯᖃᖅᓯᒪᔪᑦ ᓂᕿᖃᑦᑎᐊᕈᑎᒋᔭᐅᖃᑦᑕᕐᓂᖓᓂᒃ ᑕᒪᓐᓇ, ᐊᓐᓇᐅᒪᔾᔪᑎᒋᔭᐅᓲᖑᓪᓗᓂ, ᐊᒻᒪᓗ ᐃᓱᒫᓘᑎᒥᓂᒃ ᐅᖃᐅᓯᖃᖃᑦᑕᖅᓯᒪᔪᑦ ᓯᕗᓂᒃᓴᖓᑕ ᐱᑭᐊᓚᓱᖅᖅᓱᐊᑉ. ᐅᐸᑦᑕᐅᓴᕋᐃᒍᓐᓇᖅᓯᓂᖅᓴᐅᒐᔭᖅᑐᒋᔭᐅᕗᖅ ᑕᒪᓐᓇ ᐊᒻᒪᓗ ᐆᒪᔪᖏᑦ ᓄᓇᒦᙶᖅᑐᓪᓗ ᐃᒪᕐᒥᓗ ᓯᓚᑉ ᐊᓯᔾᔨᖅᓯᒪᓕᓛᕐᓂᖓᓄᑦ ᐃᖃᓗᓕᕆᔪᖃᕐᓂᖅᓴᐅᓕᕐᓗᓂ, ᐅᓯᑲᖅᑕᖅᑐᖃᖃᑦᑕᓂᕐᓴᖅᐅᓗᓂ, ᐳᓚᕋᖅᑐᓕᕆᓂᖅ ᐊᒻᒪᓗ ᐱᕙᓪᓕᐊᕕᐅᓂᖅᓴᐅᓕᕐᓗᓂ ᑕᒪᓐᓇ. ᐃᑲᔫᑎᖃᕈᓐᓇᕐᓂᖏᑦ ᐊᒻᒪᓗ ᐊᑦᑐᐃᓂᖃᕈᓐᓇᕐᓂᖏᑦ ᑕᒪᒃᑯᓄᖓ ᖃᓄᐃᓕᐅᕈᑕᐅᒐᔭᖅᑐᓄᑦ ᓄᓇᓕᐅᔪᓄᑦ ᐊᒻᒪᓗ ᐊᕙᑎᑉ ᐃᒪᖓᓗ ᐊᓯᔾᔨᖅᓴᕋᐃᒍᓐᓇᕐᓂᖓᓄᑦ ᖃᐅᔨᒪᔭᐅᙱᑦᑐᑎᑦ, ᐃᓄᐃᑦ ᐃᓚᐅᖃᑕᐅᔭᕆᐊᖃᓪᓚᕆᑦᑐᑦ ᐃᒪᐃᑦ ᐊᐅᓚᑕᐅᓂᒃᓴᖏᑦ ᐱᓪᓗᒋᑦ ᖃᐅᔨᒪᓇᑦᑎᐊᖁᓪᓗᒍ ᒪᑭᒪᔪᒃᑯᑦ ᐱᕙᓪᓕᐊᒍᑎᒋᔭᐅᔪᓐᓇᕋᔭᕐᒪᑦ ᐊᒻᒪᓗ ᓴᐳᔾᔭᐅᓗᓂ ᐃᒪᖓ ᐊᒻᒪᓗ ᐃᒪᕐᒦᙶᖅᑐᖁᑎᖏᑦ ᓄᓇᒦᙶᖅᑐᖁᑎᖏᓪᓗ.

ᐊᒥᓱᒻᒪᕆᖕᓄᑦ ᐊᕐᕌᒍᓄᑦ ᐊᓂᒍᖅᑐᓄᑦ, ᐱᑭᐊᓚᓱᖅᓱᐊᖅ ᐱᒻᒪᕆᐅᓯᒪᕗᖅ ᐃᖏᕐᕋᔾᔪᑎᒋᔭᐅᕙᑦᑐᑎᑦ ᐃᓄᐃᑦ ᓅᖃᑦᑕᕈᓐᓇᖅᑐᑎᑦ. ᐊᐅᓪᓚᖃᑦᑕᓲᑦ ᐱᑭᐊᓚᓱᖅᓱᐊᒃᑯᑦ ᓯᑯᒃᑯᑦ, ᐃᒪᒃᑯᑦ, ᐅᕝᕙᓘᓐᓃᑦ ᖃᖓᑕᓲᒃᑯᑦ ᐃᑲᔪᖅᓯᒪᕗᖅ ᐃᓚᒌᑦ ᓴᙱᔫᖏᓐᓇᕐᓗᑎᑦ, ᐃᓕᖅᑯᓯᖏᑦ ᑕᐅᖅᓰᓂᒃᑯᓪᓗ ᑲᓱᖅᓯᒪᐅᖅᑐᑎᑦ ᐃᓄᐃᑦ ᓄᓇᕗᒻᒦᙶᖅᑐᑦ, ᑲᓇᑕᒥ ᐊᒻᒪᓗ ᑲᓛᖡᑦ ᓄᓈᓐᓂ. ᐊᕐᕌᒍᕋᑖᖑᓕᖅᑐᓂᓪᓕ ᐊᒃᓱᕈᕐᓇᖅᓯᓯᒪᓂᖅᓴᐅᓕᖅᐳᖅ ᐊᐅᓪᓚᕐᓗᓂ ᓄᓇᓕᕐᔪᐊᖑᔫᒃ ᑭᒡᓕᖏᑎᒍᑦ ᐱᑭᐊᓚᓱᖅᓱᐊᕐᒥ ᐊᑦᑕᓇᖅᑕᐃᓕᒪᓂᖅᓴᐅᒐᓱᐊᓕᕐᓂᖏᓐᓄᑦ ᖃᓄᐃᑦᑕᐃᓕᒪᓂᖅᓴᐅᑎᑦᑎᓇᓱᓐᓂᖏᓐᓄᓪᓗ ᓄᓇᓕᕐᔪᐊᑉ ᐊᓯᐊᓅᕐᓗᓂ.

ᑕᒪᒃᑯᐊ ᐃᓱᒫᓘᑎᒋᔭᐅᔪᑦ ᖃᓄᐃᓕᐅᕈᑎᒋᓇᓱᒃᖢᒋᑦ, ᐱᑭᐊᓚᓱᖅᓱᐊᕐᒥ ᑲᑎᒪᔨᖏᑦ ᐅᓂᒃᑳᕐᒥᒃ ᓴᒃᑯᐃᓚᐅᖅᓯᒪᕗᑦ 2017-ᖑᑎᓪᓗᒍ ᓇᓗᓇᐃᖅᓯᓪᓗᑎᑦ ᑕᒪᐃᓐᓂ ᐱᓇᓱᐊᒐᖏᑦ ᐃᓄᐃᑦ ᓄᓇᕗᑦ, ᑲᓇᑕᒥ ᐊᒻᒪᓗ ᑲᓛᖡᑦ ᓄᓈᓐᓂ ᐱᓇᓱᐊᕋᓱᒃᑕᖏᓐᓂᑦ; ᐱᖃᓯᐅᑎᓪᓗᒋ ᐃᓄᐃᑦ ᐊᐅᓚᑦᑎᔭᕆᐊᖃᕐᓂᖏᑦ ᐅᐊᑦᑎᖃᑦᑕᕐᓗᑎᓪᓗ ᐱᑭᐊᓚᓱᖅᓱᐊᕐᒥ, ᐊᒻᒪᓗ ᓅᒃᓴᕋᐃᓐᓂᖅᓴᐅᔭᕆᐊᖃᕐᓂᖏᑦ ᐃᓄᐃᑦ ᑲᓇᑕᒥ ᑲᓛᖡᑦ ᓄᓈᓐᓄᓪᓗ.

ᐃᓄᐃᑦ ᐊᒻᒪᓗ ᒐᕙᒪᒃᑯᑦ ᐱᓕᕆᖃᑎᒌᖕᓂᖏᑕ ᑲᑎᒪᔨᕋᓚᖏᑦ ᐋᖅᑭᒃᑕᐅᓚᐅᖅᓯᒪᕗᑦ, ᐃᓚᖓᒍᑦ, ᓯᕗᒧᐊᑦᑎᒍᒪᓪᓗᑎᑦ ᑲᓇᑕᑉ ᐱᓕᕆᐊᖃᕈᒪᓂᖃᕐᓂᖏᑦ ᓄᑖᕐᒥᒃ ᐃᓄᖕᓂᒃ ᐱᓕᕆᖃᑎᖃᕆᐊᒻᒪᕆᓐᓂᐊᕐᓂᖏᓐᓂᒃ, ᑐᙵᕕᖃᕐᓗᓂ ᐃᓕᓴᕆᔭᐅᓗᑎᑦ ᐱᔪᓐᓇᐃᑏᑦ, ᐃᑉᐱᒍᓱᑦᑎᐊᕐᓂᖅ, ᐱᓕᕆᖃᑎᒌᖕᓂᒃ ᐊᒻᒪᓗ ᐃᖅᑲᓇᐃᔭᖃᑎᒌᖕᓂᖅ. ᐱᓇᓱᐊᒐᓕᒃ ᐃᓄᐃᑦ ᐊᒻᒪᓗ ᒐᕙᒪᒃᑯᑦ ᐱᓕᕆᖃᑎᒌᖕᓂᖏᑦ ᑲᑎᒪᔨᕋᓛᑦ ᓯᕗᒧᐊᑦᑎᑕᐅᓗᑎᑦ ᐅᖃᖅᑕᐅᓯᒪᔪᑦ ᐱᓕᕆᐊᕆᔭᐅᒐᔭᖅᑐᑦ ᐱᐅᓯᕚᓪᓕᖁᔭᐅᓪᓗᓂ ᐊᕙᑎᒥ ᓴᐳᔾᔨᓂᖅ ᐊᒻᒪᓗ ᐊᐅᓚᑦᑎᓂᖅ ᐃᓄᐃᑦ ᓄᓇᖓᓂᒃ.

ᐅᓪᓗᒥᐅᔪᖅ, ᐃᑲᔪᖅᑕᐅᖁᓪᓗᒋᑦ ᐃᓄᐃᑦ ᓄᓇᖓᑦ ᐊᒻᒪᓗ ᑕᒪᐃᓐᓂ ᑲᓇᑕᒥᐅᑕᐅᔪᑦ, ᑲᓇᑕᑉ ᓯᕗᓕᖅᑎᕐᔪᐊᖓ ᔭᔅᑎ ᑐᕉᑐ ᐊᒻᒪᓗ ᐃᓄᐃᑦ ᓯᕗᓕᖅᑎᖏᑦ ᐱᓕᕆᐊᖃᕐᓂᐊᕐᓂᕋᖅᓯᒪᕗᑦ ᐃᖅᑲᓇᐃᔭᖃᑎᒌᓪᓗᑎᑦ, ᐊᒻᒪᓗ ᑎᐊᓐᒫᒃ ᒐᕙᒪᖏᓐᓂᒃ ᐊᒻᒪᓗ ᑲᓛᖡᑦ ᓄᓈᓐᓂ ᐱᓕᕆᖃᑎᖃᕆᐊᒻᒪᕆᓪᓗᑎᑦ, ᐊᖅᑯᓯᐅᕐᓂᐊᕐᒪᑕ ᓯᕗᒧᐊᑦᑎᑕᐅᓗᑎᑦ ᒪᑭᒪᔪᓐᓇᖅᑐᒥᒃ ᐃᒪᕐᒥᐅᑕᐃᑦ ᐊᐅᓚᑕᐅᓂᒃᓴᖏᓐᓂᒃ ᐊᒻᒪᓗ ᐊᕙᑎ ᓴᐳᔾᔭᐅᓂᖓᓄᑦ ᐱᑭᐊᓚᓱᖅᓱᐊᕐᒥ, ᐊᒻᒪᓗ ᓅᖃᑦᑕᕆᐊᕈᓐᓇᕐᓗᑎᑦ ᐃᓄᐃᑦ ᓄᓇᓕᕐᔪᐊᑉ ᓇᓕᐊᓐᓄᑐᐃᓐᓇᖅ. ᐱᓕᕆᐊᖓ ᓯᕗᒧᐊᑦᑎᑕᐅᓗᓂ ᐱᑭᐊᓚᓱᖅᓱᐊᖅ ᐱᒋᐊᕈᑎᒋᔭᐅᓂᐊᖅᑐᖅ ᐱᓇᓱᐊᒐᕆᔭᐅᓯᒪᔪᑦ ᐋᖅᑮᓗᑎᑦ ᐊᓯᖏᓐᓂᒃ ᐃᒪᕐᒥᐅᑕᐃᑦ ᓴᐳᔾᔭᐅᕝᕕᖏᓐᓂ ᓲᕐᓗᒃ ᐃᖅᑲᓇᐃᔭᕈᑎᒋᔭᐅᓯᒪᔪᖅ ᐋᖅᑭᒃᑕᐅᓂᖓ ᑕᓪᓗᕈᑎᐅᑉ ᐃᒪᖓ. ᐸᕐᓇᒍᑎᖏᑦ ᑐᙵᕕᖃᕐᓂᐊᖅᑐᑦ ᐋᖅᑭᓱᖅᑕᐅᓯᒪᔪᑦ ᐋᖅᑭᒃᑕᐅᑎᓪᓗᒋᑦ ᐊᓯᖏᑦ ᐅᑭᐅᖅᑕᖅᑐᒥ ᐃᒪᕐᒥᐅᑕᐃᑦ ᓴᐳᔾᔭᐅᕝᕕᖏᑦ ᐊᒻᒪᓗᑦᑕᐅᖅ ᖃᐅᔨᔭᐅᓯᒪᓂᑯᑦ ᖃᐅᔨᓵᑦ ᑐᙵᕕᓖᑦ ᓄᓇᖃᖅᑳᖅᓯᒪᔪᓄᑦ ᐊᒻᒪᓗ ᖃᓪᓗᓇᕐᔨᕐᖓᑦ ᖃᐅᔨᒪᔭᖏᓐᓂᒃ, ᐊᒻᒪᓗ ᑐᙵᕕᖃᕐᓗᑎᑦ ᐊᑐᓕᖅᑎᑕᐅᓯᒪᔪᑦ ᐃᒪᕐᒥᐅᑕᓕᕆᓂᕐᒧᑦ ᐊᐅᓚᑦᑎᒍᑏᑦ ᐃᓱᒪᓕᐅᕈᑕᐅᖃᑦᑕᓂᐊᕐᒪᑕ ᒪᑭᒪᔪᓐᓴᕐᓂᒃᑯᑦ, ᐱᕙᓪᓕᐊᓂᒃᑯᑦ ᓴᐳᔾᔭᐅᓂᒃᑯᓪᓗ ᑕᕆᐅᖅ ᐊᒻᒪᓗ ᐃᒪᕐᒦᙶᖅᑐᑦ ᓄᓇᒦᙶᖅᑐᓪᓗ ᐱᑭᐊᓚᓱᖅᓱᐊᕐᒥ.

ᑕᒪᓐᓇ ᐱᓕᕆᐊᖅ ᐃᑲᔪᕐᓂᖃᕐᓂᐊᖅᑐᖅ ᐃᓄᐃᑦ ᓄᓇᓕᖏᑦ ᓴᙱᔫᓕᕐᓗᑎᑦ, ᓴᐳᔾᔭᐅᓂᖏᑎᒍᑦ ᐊᕙᑎᑉ ᐊᒻᒪᓗ ᐸᐸᑕᐅᓗᓂ ᐊᔾᔨᒌᙱᑦᑐᖅ ᐆᒪᔪᐃᑦ ᑕᕝᕙᓂ ᐊᔾᔨᐅᙱᑦᑐᒥ ᓄᓇᒥ. ᓴᐃᒻᒪᖃᑎᒌᖕᓂᖅ ᐊᒻᒪᓗ ᓇᒻᒥᓂᖅᓱᕆᐊᕐᓂᖅ ᐊᑑᑕᐅᓪᓚᕆᒃᑯᑎᑦ ᑲᔪᓯᓂᖃᕐᓂᐊᖅᑐᖅ ᑕᒪᔅᓱᒧᖓ ᒐᕙᒪᒃᑯᑦ ᐱᓇᓱᐊᒐᖃᕐᓂᐊᕐᓂᖏᑦ ᐃᓄᖕᓄᑦ ᐊᒻᒪᓗ ᐊᖅᑮᔪᖃᕐᓗᓂ ᐃᓄᐃᑦ ᓯᕗᓕᖅᑎᖏᓐᓂᒃ ᐱᑭᐊᓚᓱᖅᓱᐊᖅ ᐃᑲᔪᖅᑐᖅᑕᐅᓗᓂ ᑕᒪᔅᓱᒥᖓ ᑎᑭᑕᐅᓇᓱᐊᖅᑐᒥᒃ ᑎᑭᑦᑎᓂᐊᕐᒪᑕ. ᐅᑉᐱᕈᓱᑉᐳᒍᑦ ᑕᒪᓐᓇ ᐱᓕᕆᐊᖅ ᐊᔾᔨᐅᙱᑦᑐᒥᒃ ᐱᕕᒃᓴᖃᑦᑎᓐᓂᐊᕐᒪᑎᒍᑦ ᑲᑎᓪᓗᑕ ᓴᙵᑦᑎᑕᐅᖁᓪᓗᒍ ᐃᒪᕐᒥ ᐸᐸᑦᑎᓂᕐᒥᒃ, ᐊᒻᒪᓗ ᐋᖅᑮᓗᑕ ᓴᙱᔪᒥᒃ, ᒪᑭᒪᔪᓐᓇᑦᑎᐊᖅᑐᒥᒃ ᐅᑭᐅᖅᑕᖅᑐᒥ ᐃᓄᐃᑦ ᑲᑐᔾᔨᒍᓐᓇᕐᓗᑎᑦ ᑲᒪᑦᑎᐊᓂᒃᑯᑦ ᐊᐅᓚᑦᑎᖃᑦᑕᕈᓐᓇᓛᕐᓂᖏᓐᓂᒃ ᓯᕗᓂᒃᓴᒥᓗ ᐱᕕᖃᕈᓐᓇᓛᕐᓂᖏᓐᓂᒃ ᓯᕗᒧᐊᑦᑎᐊᕐᓗᑎᑦ.