Inuit ilisimasaat
Inukitsoq Sadorana
Piniartoq Siorapalummioq
Eva Aariak:
"Ullumi katerittuni Pikialasorsuarmut tunngasumik oqaaseqarmata, puisit uumasut assigisaalu, inuit nerisai taamanilu atugaat Canadamiunillu Qaanaarmiullu assigiinnik peqarmata, massakkut aserfallammata. Tamanna qanoq oqaaseqarfigisinnaaviuk?"
Inukitsoq Sadorana:
"Tassa taanna Ikermik uagut taasarparput Pikialasorsuaq, uumasut assigiinngitsorpassuit qilalukkat qaqortat qernertallu, puisit, ussuit, natsersuit taavalu aasalernerani eqaluppassuit sinersisarput, taavalu miluumasut erniortuusarlutik, nannullu nerisaat. Pingaarnerpaamillu appaliarsuit mitit naajat taateraat timmiarpassuit taakani neriniartarput, uagullu taakku nerisaralugit pinngitsoorsinnaanagit neqit. Tassa taakku nerisavut pingaarnerpaat eqaluillu, eqalupparpassuit sinersertarput angisuut, sulilu alliartorlutik, mikinerusimagaluarput ukiuni kingullerni imak angitigilersimallutik, sineriak manna avunga tamaat eqalunniartarfiuvoq, avannamut Inuarfissuarput qaqqanngitsumut eqaluppassuit ersertarput aasakkut maanga anngullutik, tassa taakku kuukkut Iterlassuakkut majortartut eqaluit, sisusarlutillu, tassa uagut nerisagut taakku. Uuliamillu tassa mingutsitsisoqajallappat nunguttussat sorpassuillu, qilalukkat arferillu taavaniittarput piniagassat assigiinngitsorpassuit."