Nutaarsiassat

Raketi Ruslandimeersoq inoqarfiusumut nakkartussaavoq

Raketi sapaatip akunnerata matuma naanerani Canadap aamma/imaluunniit Kalaallit Nunaata issittumi imartaata ilaanut nakkartinneqartussatut pilersaarutigineqartoq naggueqatigiinnit inunnit assorsuaq ernummatigineqarpoq. "Ikummatissaata hydrazinip issittup imartaanut siaruaattussap, savimerngit assigisaasalu seqummakuisa siaruaallutik nakkartussat avatangiisinut kingunerisassai apeqqusiinissamut tunngaviliipput", Okalik Eegeesiak, ICC-mi siulittaasuusoq Pikialasorsuarmullu Isumalioqatigiissitami siulittaasuusoq taama oqarpoq.

Pikialasorsuaq ammalataavoq/imarnersaavoq uumassusilinnut kulturimullu immikkuullarissuusoq Canadap Kalaallit Nunaatalu akornanniittoq uumasorpassuarnullu ingerlaartuartunut soorlu qilalukkanut qernertanut qaqortanullu, aarrinut, arfivinnut timmiarpassuarnullu pingaaruteqarluinnartoq. "Imaanngilaq raketip nakkarfissaa inoqanngivissuusoq. Imarnersaq manna naggueqatigiit inuit inoqarfinni Kalaallit Nunaanniittuni Canadamiittunilu inuuniarnikkut pingaaruteqartupilussuuvoq", Eegeesiak oqarpoq. "Inuit maani najugaqartuupput, Inuit immap uumasuinik tamaaniittunik atuisuupput ilaquttatik inuussutissaqaqqullugit, manna angerlarsimaffigaarput".

Pikialasorsuaq ammalataavoq/imarnersaavoq sikumik ungalusaq. Nunarsuup affaani avannarlermi anginerpaavoq, tamaanilu pinngortitap ataqatigiiffiani uumassusillit pinngorarfiat annerpaaq qaasuitsup killeqarfiata avannaaniittoq. Baffinip Kangerliumanersuata avannaaniippoq Kalaallit Nunaata Canadallu ilaani Umimmaat Nunaata eqqaaniittoq Ikeq tikillugu annertussuseqarluni.

Pikialasorsuarmut Isumalioqatigiissitat januar 2016-mi pilersinneqarput naggueqatigiinnut Inunnut pinngortitap Pikialasorsuarmut atasup pingaaruteqassusiata qulaajaavigineqarnissaa Inuillu tamaani najugaqartut qanoq eqqarsaateqarneri pillugit isumaliutersuummik nalunaarusiornissaq siunertaralugu. Isumalioqatigiissitat ilaasortanit pingasuusunit siulersorneqarput ukuusunit, Okalik Eegeesiak, ICC-mi siulittaasoq; Nunavumi Naalakkersuisuni siulittaasuusimasoq, Eva Aariak; Kalaallillu Nunaanni Naalakkersuisuni siulittaasuusimasoq, Kuupik Kleist.

Isumalioqatigiissitat piffissami matumani Pikialasorsuup qanigisaani inoqarfinni najugaqartuusut tusarniaaffigileruttorpaat, tamaaniittup pinngortitap ataqatigiiffiata isumakulunnartortai neriuutissartaalu pillugit tusarniaaffigalugit. "Sumi tamani tikitatsinni inuit kissaatigisatik tusartittarpaat, sumiiffiuip pineqartup siunissami naggueqatigiinnit Pikialasorsuup eqqaamiuinit "illuatungeriinnit" toqqartumik peqataaffigineqartumik qanoq aqunneqarsinnaanera pillugu kissaatiminnik oqariartuuteqarlutik," Eegeesiak ilassuteqarpoq.

"Pikialasorsuaq allanngornernit sunnertiasuuvoq, assersuutigalugu klimamut attuumassuteqartunit, takornariaqarnermut suliffissuaqarnermulluunniit attuumassuteqartunit pisunit sunnerneqarsinnaalluni aamma eqqakkanit toqunartortalinnit saviminernit assigisaannillu seqummakunit qilammit nakkaasunit", Eva Arriak oqarpoq. "Eqqakkanik pineqartunik umiarsuarniit igitseqqusaanngilluinnassagaluarputit, taava sooq nunamiit qilammilluunniit nakkartut akuerineqassappat?".

Inuit najugaqarfimminnit tunngavilikkanik misissuinernut aqutsinermut atorneqarsinnaasunik sakkussanik ineriartortitsinermut toqqartumik peqataarusullutik kissaateqarnertik oqariartuutigereerpaat, assersuutigalugu umiarsuit angallattut amerliartortunut, takornariaqarnermut, aalisarnermut, aatsitassarsiornermulluunniit tunngassuteqartunut. Isumalioqatigiissitat naggueqatigiit Inuit Pikialasorsuup qanigisaani najugaqartunut tusarniaanertik ingerlatileruttorpaat tamaani pissutsinut qanimut piviusunik tunngaveqartunik ilisimasaannik tusarniaallutik siunissamilu qanoq iliuuseqarsinnaanerit pillugit qulaajaallutik. "Inuit Canadamiut Kalaallillu pisut ulluinnarni inuunerannut annertuumik kinguneqarsinnaasut pillugit pinngitsooratik tusaaneqartariaqarput ilisimatinneqarlutillu" Kuupik Kleist ilassuteqarpoq, "Issittoq eqqaavittut kialuunniit eqqagaanit atorneqassanngilaq".

Annertunerusumik paasiniaaffigineqarsinnaavoq

Carole Simon
ICC Canada
csimon@inuitcircumpolar.com
613-563-2642

Alfred Jakobsen
Oceans North Greenland
aerj58@gmail.com

Isumalioqatigiissitat

Okalik Eegeesiak
chair@inuitcircumpolar.com
613-563-2642

Kuupik Kleist
kvk@ggnuuk.gl
+299 54 78 58

Eva Aariak
eva.aariak@gmail.com
867-222-8355