Nutaarsiassat

Pikialasorsuaq pillugu Isumalioqatigiissitap naggueqatigiinnit Inunnit siulersorneqartup Aasuittumi Mittimatalimmilu tusarniaanini naamasseqqammerpai

Mittimatalik/Pond Inlet – Pikialasorsuaq pillugu isumalioqatigiissitap Nunavummi nunaqarfinni Aasuittumi Mittimatalimmilu tusarniaanini siulliit naammasseqqammerpai. Tusarniaanerit ulluni tallimani nunaqarfinni marlunni ingerlanneqarput nunaqarfinnillu allanit tikittunik, Kangiqtugaapimmit (Clyde River), Ikpiarsummit (Arctic Bay) aamma Qaasuittumit (Resolute Bay) peqataaffigineqarput.

Isumalioqatigiissitani ilaasortap Kuupik V. Kleistip saniatigut KNAPK sinnerlugu Bjarne Lyberth aamma Alfred Jakobsen (Oceans North Greenlandimit) Canadap Avannaarsuanut Issittumut angalaqataapput ilisimasanik avitseqatigiinnernut tusarniaanernullu suliaanut malinnaallutik ikiuullutillu.

"Nunaqarfinni tusarniaalluta tikitatsinni innuttaasut taama amerlatigisut ilisimasaminnik isummaminnillu apuussiniarlutik peqataalluarnerat assorujussuaq nuannerpoq. Peqataanerat uummaarissumik ingerlavoq isummallu siammasissupilussuit apuunneqarput" Isumalioqatigiissitanut ilaasortaq Eva Aariak oqarpoq. "Taama kissalaartumik inussiarnersumillu tikilluaqquneqarput tamatsinnut attortinnarpoq."

"Nunaqarfinnit peqataasut ilarpassuisa tusarniaanerup piffissami matumanerpiaq ingerlanneqarnera assut qujamasuutigaat, Pikialasorsuup atorneqarnera avataaniillu soqutigineqarnera malunnaatilimmik annertusiartorsimammat" Kuupik Kleist oqarpoq. "Qamuuna attortippunga tusarniaanitsinni nunaqarfinnit peqataasut, qanga naggueqatigiit Inuit Pikialasorsuup kangiatungaaneersut kitaatungaaneersullu imminnut tikeraartarsimaneri pillugit oqaluttuaat, attaveqatigiinnerullu tamatuma nutarterlugu nangeqqinneqarnissaa pillugu kissaatigisaat tusarlugu."

"Innuttaasut nunaqarfinneersut avatangiisitik inuussutissatigullu isumannaatsumik imminnut pilersortuarsinnaanermut tunngatillugu nalunaarsuinernut aqutsinernullu toqqartumik akuutinneqarusunnertik kissaatigalugu erseqqissumik oqariartuutigaat," Isumalioqatigiissitani Siulittaasoq Okalik Eegeesiak ilanngussivoq. "Inuiaqatigiiuvugut ataasiusut oqaluttuarisaanerput ataasiuvoq, kingornussavut Pikialasorsuarlu pillugu siunissamut takorluukkavut ataatsimoorfigaarput."

Nunaqarfinni tusarniaanerit nangillugit Isumalioqatigiissitaq i Augustimi Kalaallit Nunaanni nunaqarfinnut Pikialasorsuup qanigisaaniittunut angalaassaaq.

Kalaallit Nunaanni tusarniaanerit naammasseriarpata, Isumalioqatigiissitaq nunaqarfinnut tusarniaaffigisimasaminut uterluni paasissutissat katersat inaarutaasumik nalunaarusiarineqarnerat tamanut ammasumik aalajangiisartunullu saqqummiunneqannginnerani apuuteqqaarusuppaat.

Annertunerusumik paasiniaaffigineqarsinnaavoq

Carole Simon ICC Canada
csimon@inuitcircumpolar.com
613-563-2642

Alfred Jakobsen Oceans North
aerj58@gmail.com

Isumalioqatigiissitat

Okalik Eegeesiak
chair@inuitcircumpolar.com
613-563-2642

Kuupik Kleist
kvk@ggnuuk.gl
+299 54 78 58

Eva Aariak
eva.aariak@gmail.com
867-222-8355